Në Tetovë po priten drunjtë e vjetër për të bërë një vend parkimi rreth objekteve prapa stacionit të vjetër të zjarrfikësve. Në këtë vend, oborri i cili dikur ka qenë një zonë e gjelbëruar po pastrohet me makineri ndërtimi, shkruan Telma, përcjell Nistori.
Me një reagim, dolën nga nisma qytetare “Tetova do park”, e cila për një kohë kërkonte më shumë parqe dhe gjelbërim në vend të betonizimit të qytetit. Ata thonë se shkatërrimi i këtyre hapësirave të vogla të gjelbra për të siguruar një hapësirë shtesë parkimi nuk është dhe nuk mund të jetë një zgjidhje për bllokimin e trafikut.
Komuna e Tetovës njofton se aktivitetet ndërtimore janë në koordinim me qytetarët dhe se janë duke u realizuar sipas kërkesës së nënshkruar nga 100 qiramarrës që jetojnë në rr. “Dimo Gavrovski Kara” për rregullimin e hapësirës, e cila është paraparë të ketë 100 parkingje të mbyllura.
“Me datë 05.04.2022, Sektori për Veprimtari Komunale dhe mbrojtje të mjedisit dhe natyrës i njoftoi qytetarët se sipas programit tonë vjetor për realizimin e parkingjeve të mbyllura në Tetovë, blloku urban 37 është paraparë të zbatohet në periudhën prill- korrik, me këtë do të vendosen pllaka të reja bekatoni, do të vendosen shenja horizontale dhe ndriçim dhe një rampë për hyrje dhe dalje në parking. Më datë 26.07.2022 është dhënë urdhër për punime ndërtimore në rr. D.G. Kara – Blloku urban 37″ – thonë nga Komuna e Tetovës.
Qytetarët e Tetovës thonë se gjelbërimi që ishte këtu, si dhe shumë zona të tilla në qytet, nuk po mirëmbahen dhe janë kundër prerjes së pemëve.
Në muajin prill të këtij viti janë prerë dhjetëra pemë edhe në rrugën “Strasho Pinxhur” për shkak të rikonstruksionit. E më pas pati reagime të ashpra nga qytetarët dhe shoqatat që ishin kundër prerjes së pemëve disa dekadash. /Nistori/
