Nënkryetari BDI-së, Bujar Osmani, ka lënë të hapur mundësinë e bashkëpunimit me të gjithë subjektet politike shqiptare për çështjet që lidhen me integrimin evropian, përcjell Nistori.
Duke folur në KohaCast, Osmani tha se, pavarësisht qëndrimit kritik ndaj VLEN-it, për çështje madhore si integrimi evropian, BDI është e gatshme të ulet dhe të diskutojë me secilin.
“VLEN është një prej fatkeqësive që i ka ndodhur shqiptarëve”, deklaroi Osmani, duke shtuar se për hir të integrimeve evropiane, të cilat i konsideron jetike, “BDI do të ulej me secilin për çështjen e Bashkimit Evropian”.
I pyetur nëse kjo përbën një derë të hapur edhe për Izet Mexhitin, Osmani tha se qëndrimi vlen për të gjithë.
