Në vend është shumë e lehtë të aplikosh dhe të marrësh një kredi “të shpejtë” nga kompanitë financiare. Për shkak të thjeshtësisë së procedurës së aplikimit për këto kredi, edhe numri i abuzimeve është i lartë. Shpesh, buletini i policisë është i mbushur me raste kur mashtruesit me letërnjoftime të dikujt tjetër marrin kredi të shpejta dhe viktimat nuk janë në dijeni deri sa të marrin njoftimin se nuk e kanë paguar këstin. MPB ka bërë me dije se këtë vit deri në korrik janë evidentuar 65 raste të keqpërdorimit të të dhënave personale. “Në Ministrinë e Punëve të Brendshme deri në korrik janë raportuar 65 raste të keqpërdorimit të të dhënave personale, përkatësisht aplikimit dhe miratimit të kredive të shpejta me letërnjoftim të dikujt tjetër. Për këto raste në Prokurorinë Publike janë dorëzuar nëntë kallëzime penale dhe 30 njoftime me shkrim, bëjnë të ditur MPB.
Abuzimet me kreditë e shpejta deri në korrik janë një çerek më të larta krahasuar me të gjithë vitin e kaluar, kur në dymbëdhjetë muaj u raportuan 43 raste mashtrimi. “Vitin e kaluar janë evidentuar 43 raste të mashtrimit me kredi të shpejta, me të cilat pas masave dhe veprimeve janë dorëzuar 16 kallëzime penale dhe 24 njoftime me shkrim në OPS-të kompetente, ndërsa në kuadër të rasteve të sqaruara janë raportuar 24 autorë dhe të dëmtuarit i është dorëzuar një njoftim që personi të bëjë padi private kundër autorit të zbuluar”, njofton MPB.
Sipas anketës së IPIS-it, të realizuar në muajin maj, 80.3% e qytetarëve thonë se nuk do të merrnin një kredi të shpejtë që miratohet më lehtë, por me kamata më të larta, ndërsa 10.2% thonë se do të merrnin këtë lloj kredie. Në anketë, gati dy të tretat e qytetarëve ose 65.3% thonë se shteti duhet të rregullojë më tej kushtet dhe mënyrat për marrjen e kredive të shpejta në cash, ndërsa 16.7% mendojnë se nuk ka nevojë.
Megjithatë, ka njerëz që aplikojnë për një kredi të shpejtë me përgjegjësinë e tyre. “Cash në dorë deri në 15 minuta”, “Kredi me pagesë pa interes” tingëllojnë joshëse për ata që kanë mungesë të burimeve financiare për momentin, ndaj vendosin ta aplikojnë, procedurë për të cilën shumë më vonë pendohen. Edhe pse shpallen me interes 0%, në rast të vonesës shtatëditore të pagesës, duhet të paguani shuma të larta deri te ekzekutuesi. Mirëpo, muajin e kaluar Parlamenti miratoi ndryshimet në Ligjin për Marrëdhëniet e Detyrimeve dhe Ligjin për Përmbarimin, duke i dhënë fund “robërisë së borxhit” të qytetarëve, të cilët shpeshherë viheshin në situatën e pagesës së kamatës penale, e cila tejkalonte shumën. të borxhit kryesor.
Me ndryshimet e reja, norma e interesit nuk do të lejohet të tejkalojë borxhin, gjegjësisht ndalon rrjedhën kur të arrijë shumën e borxhit kryesor, dhe kjo do të thotë se më nuk do të ketë situata ku qytetarët për borxh prej 1.000 denarë të kenë për të shlyer deri në pesëfishin e një shume më të madhe dhe e ulim parashkrimin e borxhit nga 10 në 5 vjet. Shumica miratoi edhe ndryshimet në Ligjin për shoqëritë financiare, kostoja totale e të ashtuquajturës kredi e shpejtë nuk mund të kalojë 60% të kredisë. Ndërpritet praktika me të cilën qytetarët paguanin 70.000 denarë për kredi prej 10.000 denarë. “Dyqanet e parave” filluan të shfaqen në 2015. Rregullorja e tyre është mjaft e paqartë, edhe pse Ministria e Financave është përgjegjëse për to. /koha/
