Një javë deri në mbajtjen e zgjedhjeve parlamentare dhe raundit të dytë të zgjedhjeve presidenciale, përplasjet mes partive vazhdojnë dhe në fokus janë edhe kushtet e partive për koalicionet paszgjedhore. Si VMRO-DPMNE ashtu edhe LSDM bëjnë thirrje për pjesëmarrje masive. VMRO-DPMNE pret fitore të dyfishtë, ndërsa LSDM thotë se nuk ka tregti me të ardhmen e vendit dhe se rruga e vetme është integrimi evropian. Kryetari i VMRO-DPMNE-së, Hristijan Mickoski, në tubimet e djeshme tha se mesazhi i qytetarëve është i qartë dhe se shteti do të jetë krenar, i denjë dhe i transformuar. Ai pret fitore bindëse për Gordana Siljanovska-Davkovës si kandidate presidenciale e koalicionit “Maqedonia juaj”.
Ai tha se koalicioni me opozitën shqiptare “VLEN” dhe ndryshimet kushtetuese do të diskutohen pas zgjedhjeve. Ai ka theksuar se ai dhe partia e tij nuk funksionojnë në bazë të shantazheve dhe kërcënimeve dhe se për momentin VMRO-DPMNE është e fokusuar në zgjedhje dhe pas përfundimit të tyre do të ulen në tavolinë me partitë opozitare. Për BDI-në dhe qëndrimin e kryetarit të partisë Ali Ahmeti të cilët thirren në Marrëveshjen e majit, Mickoski thotë se kjo parti duhet të shkojë në opozitë.
“Demokracia bazohet në parimin – kushdo që ka shumicën në Parlament, formon qeverinë. Nuk e di se për cilën marrëveshje maji flet BDI, nuk e di se për cilin rregull ‘fituesi me fitues’. Kishte një rregull në të kaluarën ‘fituesi me fituesin’ që është rezultat i një marrëveshjeje të kaluar, atë marrëveshje dhe atë rregull e thyen vetë në vitin 2017 dhe do të rikujtoja sërish që politikën nuk duhet ta shohim si një ‘tryezë suedeze’, mënjanë po sikur VMRO-DPMNE fitoi shumicën, siç pritej, nuk ka as besim elementar për të bashkëpunuar me BDI-në. Pra, duhet të shkojnë në opozitë”, nënvizoi Mickoski.
Nga Fronti Europian thonë se askush nuk mund ta kontestojë legjitimitetin e tyre dhe se deputetët e Frontit Evropian janë përfaqësues të vërtetë të të gjithë popujve të përfaqësuar në këtë platformë.
“Çdo aventurë e tillë politike do të jetë e rrezikshme për të ardhmen evropiane të këtij vendi dhe për të gjitha rrethanat politike që do të ndodhin pas 8 majit. Të jeni të sigurt se asnjë grup politik nuk do të formohet pa deputetët e Frontit Evropian, sepse deputetët e Frontit Evropian janë përfaqësuesit e vërtetë të popullit shqiptar, të popullit turk, të popullit boshnjak, të popullit rom dhe të gjithë kombësitë që përfaqësohen në këtë platformë, në këtë program zgjedhor Evropa 2023-2030. Të jeni të sigurt se aventurat politike do të përfundojnë në mënyrë të palavdishme dhe më në fund do të fitojë populli”, thotë Naim Bajrami nga Fronti Europian.
Nga opozita shqiptare “VLEN” presin që diferenca e votave nga raundi i parë i kandidatëve për president në bllokun shqiptar të zvogëlohet në zgjedhjet parlamentare sepse thonë se votat e BDI-së nuk janë vetëm nga shqiptarët, por nga nëntë parti politike. Një koncept thjesht shqiptar, siç tha dje lideri i Lëvizjes Demokratike Izet Mexhiti, është i “VLEN” dhe ata kanë votat vetëm të shqiptarëve.
“Për herë të parë Ahmeti ishte në një situatë ku duhej të shpëtonte veten me votat e komuniteteve të tjera më të vogla. Po t’i shtohet edhe ryshfeti i votave dhe presionet, mbushja e kutive nga shoferi i Sadulla Durakut… Të gjitha këto do të përpunohen nga qeveria e re. Nëse ato vota përjashtohen, atëherë rezultati i tyre është nën tonën. BDI nuk është koncept i pastër shqiptar dhe është në kundërshtim me Marrëveshjen e majit”, tha Mexhiti në një paraqitje televizive.
Mexhiti tregoi se ka bisedime me VMRO-DPMNE-në, ndërsa sa i përket ndarjes së resorëve, tha se është me vend që resoret që nuk janë udhëhequr nga shqiptarët, si Ministria e Punëve të Brendshme, Byroja e Sigurisë Publike, DAP dhe Doganave, duhet të menaxhohen nga shqiptarët.
Lëvizja ZNAM dje ka prezantuar kushtet për koalicion paszgjedhor. Lideri i partisë, i cili ishte edhe kandidat për president, Maksim Dimitrievski, në një konferencë për media u dërgoi mesazhe liderëve të dy partive më të mëdha nga blloku maqedonas. Ai i bëri thirrje kryesisë së LSDM-së që në 24 orët e ardhshme të dorëzojnë dorëheqje të parevokueshme nga pozitat e tyre në parti, si dhe bartësit e listave të kandidatëve, dhe në noter të deklarojnë se nuk do të pranojnë mandate deputeti, dhe që kandidatët që janë pas në lista do t’i marrin ato mandate. ”Grupet tona punuese janë të gatshme për bisedime dhe bashkëpunim të mundshëm me ndonjë lidership të ri teknik kalimtar të LSDM-së, i cili do të shpreh vullnetin politik për të rishikuar politikat e mëparshme, për çështjet më të rëndësishme kombëtare, por edhe përgjegjësi të plotë për të gjithë individët që pa përjashtim të ligjit, pa asnjë mundësi për amnisti”, tha Dimitrievski. Ai i ka dërguar mesazh edhe udhëheqësisë të VMRO-DPMNE-së, duke treguar se pajtohet me përcaktimet e tyre programore për mospranimin e ndryshimeve kushtetuese, si dhe për mospranimin e bashkëpunimit me BDI-në.
“Ju kërkoj të konfirmoni se nuk është e vërtetë se një pjesë e udhëheqësisë të VMRO-DPMNE-së po bisedojnë bashkëpunim publik apo të fshehtë me ish-kryeministrin Zoran Zaev, përmes kandidatëve të tij fiks për deputetë, si Venko Filipçe dhe të tjerë, për të siguruar një shumicë të 2/3 në përbërjen e ardhshme parlamentare, e cila nëse realisht ekziston, nënkupton se në Qeverinë e ardhshme do të kemi drejtësi selektive, siç ka qenë më parë. Përndryshe, nëse nuk keni një qëndrim të tillë, më së miri është që të vazhdojmë dhe të bashkëpunojmë publikisht dhe do të vazhdojmë së bashku me popullin”, tha Dimitrievski.
Nga LSDM thanë se nuk pranojnë kushte dhe marrëveshje politike me askënd sepse siç thonë ata nuk ka tregti me të ardhmen e shtetit. “Të përgjigjem publikut artikullit të shkruar nga subjekti ZNAM. Së pari, udhëheqjen e LSDM-së e zgjedhin anëtarët e LSDM-së, të cilët janë trashëgimtarë të NOB dhe ASNOM-it dhe Kiro Gligorov, e jo vasalë që u dorëzuan dhe shkuan të rrinë me trashëgimtarët e Vanço Mihajllovit. Së dyti, bartësit e listave parlamentare dhe të gjithë kandidatët në listat parlamentare të LSDM-së dhe koalicionit kanë shkuar në zgjedhje për të prezantuar programin e LSDM-së dhe të partive politike që përbëjnë koalicion dhe me atë program, me ato popull, me ata përfaqësues të idesë socialdemokrate e kërkojmë zërin e qytetarëve”, tha në tubimin në Draçevë lideri i LSDM-së, Dimitar Kovaçevski.
Ai tregoi se janë të fokusuar në arritjen e rezultatit më të mirë në zgjedhjet e ardhshme të 8 majit dhe bëri thirrje për mobilizimin e të gjitha forcave demokratike dhe përparimtare për të penguar kthimin e regjimit të VMRO-DPMNE-së. “Ne nuk heqim dorë nga Maqedonia në BE! Më besoni, nuk është qëllim në vetvete! Plani ynë për një Maqedoni evropiane është shndërruar në një program konkret dhe të realizueshëm”, tha Kovaçevski.
“Levica” dje njoftoi se po ofrojnë një platformë maqedonase, e cila, siç thonë, do të ndalojë shantazhet nga minoriteti shqiptar gjatë formimit të qeverisë së ardhshme.
“Janë tre platforma që qytetarët të zgjedhin dhe u mbetet atyre të vendosin për zgjedhjet e ardhshme parlamentare të 8 majit. E para është platforma tashmë e njohur e Tiranës. Pavarësisht nëse quhen Fronti Europian apo VLEN, është e njëjta matricë neoballiste që tenton të shpërbëjë shtetin. E dyta është platforma e Sofjes e mbështetur nga partitë borgjeze maqedonase, elita e rilindur maqedonase – LSD dhe DPMNE, disa prej të cilave e mbështesin hapur, të tjerët në mënyrë të fshehtë. Informacionet tona thonë se në njëqind deri në 200 ditët e para është rënë dakord që të përfshihen bullgarët në Kushtetutë. Dhe e treta, ajo është platforma e përfaqësuar nga e Majta, dhe është një platformë maqedonase me pesë pika, me qëllim që përfundimisht të ndalet shantazhi gjatë formimit të qeverisë nga pakica shqiptare”, tha kryetari i partisë Dimitar Apasiev në Ohër. /Koha/
