Njësia Policore Galatë njofton për Nistori se personat R.R. (53) nga fshati Toplicë, i cili është blegtor dhe pronar i fermës dhe Xh.H. (46) nga Republika e Shqipërisë i cili ishte i punësuar si bari i deleve, janë thirrur për bisedë informative në lidhje me kronikën e OraNews, me pretendimin e ndalesës së paligjshme të personit Xh.H nga pronari ku ishte i punësuar.
“Më 22.05.2021 në ora 15:30 në Njësinë Policore “Galatë” janë thirrur personat R.R. (53) nga fshati Toplicë, pronar i një kopeje delesh dhe Xh.H. (46) nga Republika e Shqipërisë i cili ishte i punësuar si bari i deleve, në lidhje me botimin e mëparshëm në media, me pretendimin e ndalimit të paligjshëm të personit Xh.H”, njofton policia e Tetovës për Nistori.
Punëdhënësi R.R. në bisedën informative e ka mohuar që ai të kishte mbajtur në mënyrë të paligjshme personin nga Shqipëria dhe se nuk ka pasur asnjë mosmarrëveshje. SPB Tetovë ka marrë masa shtesë për ndriçimin e plotë të rastit. /Nistori/