Prindërit e fëmijëve me aftësi ndryshe e ngritën zërin dhe kërkojnë që më në fund të zgjidhet statusi i tyre, sepse shumica janë të detyruar të heqin dorë nga puna për të siguruar të ardhura, pasi nuk ka kush të kujdeset për fëmijët e tyre, shkruan Fokus, përcjell Nistori.
Të përkushtuar ndaj fëmijëve të tyre 24 orë në ditë, ata e bëjnë të ditur gjendjen e tyre dhe kërkojnë që të ndërmerren ndryshime, konkretisht që të fitojnë statusin prind – kujdestar. Tashmë ka nisur edhe një peticion online, nismëtare është Ançe Tufekçieva nga Strumica, nëna e Verçes, një vajzë me sindromën Down, si dhe kryetare e shoqatës “Vera”.
Siç thekson Tufekçieva në peticion, rreth 200 mijë familje në vend, që kanë fëmijë me aftësi ndryshe, janë heronj që sistemi i shtyp çdo ditë. Prindërit që janë të detyruar të heqin dorë nga puna për t’u kujdesur për fëmijët e tyre, nuk kanë sigurim shëndetësor, as rrogë, dhe as nuk u takon pensioni.
Për këtë arsye, Ançe, e mbështetur nga shumë prindër të fëmijëve me aftësi ndryshe, kërkon barazi dhe njohje ligjore të statusit “prind – kujdestar”.
“Në vendin tonë, nëna / babai i një fëmije me aftësi ndryshe nuk njihet me ligj. Na duhet ligj për prind – kujdestar! Ne nuk jemi kujdestarë të zakonshëm – ne jemi prindër biologjikë që kujdesemi për fëmijët tanë me aftësi ndryshe 24 orë në ditë, për vite, madje dekada… pa rrogë, pa sigurim, pa pension… Shumë prej prindërve nuk munden të punojnë sepse nuk ka kush të kujdeset për fëmijën.
Nuk mund të shkojmë te mjeku, nuk mund të shtrihemi kur sëmuremi, nuk mund as të dalim për darkë me miqtë nëse nuk ka kush të kujdeset për fëmijën tonë. Të gjithë kujdestarët e fëmijëve me aftësi ndryshe i respektoj dhe u përulem. Por a mendoni se edhe ne nuk meritojmë të jemi të barabartë si prindër biologjikë? Por ne heshtim, sepse nuk kemi kohë të bërtasim – përditshmëria jonë është luftë më e madhe se çdo protestë,” – shpjegon Tufekçieva në peticion.
Ajo shton se ka ardhur koha që zëri i tyre të dëgjohet, sepse aty ku merren vendimet për këta fëmijë dhe për familjet e tyre, prej kohësh nuk ka më humanizëm.
“Duke parë çdo ditë se çfarë ndodh, dhe se humanizmi ka kohë që mungon aty ku merren vendimet, mendoj se ka ardhur koha ta ngremë zërin.
Dhe jo, kjo nuk është vetëm historia ime dhe e Verçes dhe familjes sime – kjo është përditshmëria e më shumë se 200 familjeve në vendin tonë. E pa përmendur mbetet nëna me aftësi ndryshe, të cilat, pavarësisht kufizimeve të tyre, kanë sjellë jetë në botë – dhe askush nuk i njeh.
Familjet tona nuk janë raste sociale – ato janë heronj që çdo ditë shtypen nga sistemi! Mendoj se ka ardhur koha të organizohemi dhe të fitojmë statusin “prind – kujdestar”!
Mund të na duhet shumë kohë, por ta bëjmë këtë për çdo familje që ka një person me aftësi ndryshe! Ta bëjmë për brezat e ardhshëm! Presim përkrahje nga të gjithë,” – porosit nëna e guximshme.
Peticioni tashmë është duke u nënshkruar, dhe qytetarët që e kanë nënshkruar po ndajnë përvojat e tyre për këtë temë. Ata tregojnë se, pasi kanë lindur fëmijë me aftësi ndryshe, janë detyruar të heqin dorë nga profesioni dhe t’u përkushtohen fëmijëve, sepse në vend nuk ka mjaft qendra ditore ku mund të qëndrojnë fëmijët derisa prindërit janë në punë, dhe gjithashtu mungojnë kuadrot e kualifikuara për kujdesin 24 orësh ndaj tyre.
“Shteti na e vështirëson edhe më tej jetën e rëndë! Nuk kemi mbështetje të mjaftueshme nga institucionet dhe mbajmë një barrë të rëndë. Përveç shqetësimit se si ta kalojmë muajin, kemi edhe frikën e madhe për të ardhmen – çfarë do të ndodhë më pas, kur të mos kemi as pension?” – pyesin prindërit.
Disa prej tyre shtojnë se, për shumë çështje në këtë shtet ka vonesa, por besojnë se zëri i ngritur do të arrijë deri tek institucionet kompetente dhe do të sjellë shpresë për ndryshim.
Të gjithë ata që duan të mbështesin prindërit në këtë luftë, mund ta nënshkruajnë peticionin në këtë link:
