Ditë të kaluara me mosmarrëveshje, akuza dhe lëvizje për t’i joshur votuesit – kështu është muaji i dytë i “martesës së detyruar” mes ministrave dhe zëvendësministrave shtesë në qeverinë teknike (kalimtare) të Maqedonisë së Veriut, të cilën Parlamenti e votoi më 28 janar me detyrë organizimin e zgjedhjeve të drejta dhe demokratike.
Në qeverinë teknike, përveç partive në pushtet, përfaqësues të saj ka edhe partia më e madhe opozitare VMRO-DPMNE. Ideja është që asnjë politikë nuk mund të zbatohet pa një nënshkrim detyrues nga të dyja palët. Por kuptimi i qeverisë teknike tashmë po vihet në pikëpyetje, thonë analistët.
“Sipas idesë së qeverisë teknike, nga vetë emri mund të kuptojmë se është një qeveri ku duhet të marrin pjesë individë jopartiakë të dalluar në fushën e tyre (teknokracisë). Në rastin tonë nuk është kështu. Tek ne, kjo qeveri përdoret për ‘fushatë para fushatës’ në zgjedhje, ku bëhet fjalë për gjetjen e gabimeve të qeverisë së mëparshme dhe ka të bëjë me interesin e partive nga vijnë ministrat e rinj. Për shkak të numrit të madh të kundërshtimeve partiake, kjo qeveri në vend që të lehtësojë funksionimin e shtetit, gjithnjë e më shumë po e pengon dhe e vështirëson atë”, ka deklaruar për Koha, Dimitar Hristov, politolog.
Për të garantuar rregullsinë e zgjedhjeve, pesë ministritë kryesore në qeverinë teknike menaxhohen bashkërisht nga LSDM-ja në pushtet dhe opozita VMRO-DPMNE. Kur ministri është nga njëra palë, zëvendësministri shtesë është nga pala tjetër dhe anasjelltas. Këto janë Ministritë e Punëve të Brendshme, Punës dhe Politikës Sociale, Financave, Shoqërisë Informatike dhe Administratës dhe Bujqësisë. Konsiderohet se për shkak të kompetencave të tyre mund të kenë ndikimin më të madh te votuesit (ruajtja e rendit dhe qetësisë gjatë procesit zgjedhor, dhënia e ndihmës sociale, subvencionet bujqësore). Në anën tjetër BDI-ja për herë të parë mori kryeministër shqiptar, Talat Xhaferin.
TOSHKOVSKI THOTË NJË GJË, BOJMACALIEV NJË TJETËR
Mosmarrëveshjet në Ministrinë e Punëve të Brendshme (MPB) ndërmjet ministrit Pançe Toshkovski (VMRO-DPMNE) dhe zëvendësministrit shtesë Mitko Bojmacaliev (LSDM) filluan në fillim të bashkëpunimit të tyre. Me ardhjen në detyrë, Toshkovski urdhëroi shqyrtimin e raportit për vrasjen e dyfishtë të Vanja Gjorçevskës dhe Pançe Zhezoskit, trupat e të cilëve u gjetën më 3 dhjetor 2023 në afërsi të Shkupit, vrasje që tronditën opinionin në Maqedoninë e Veriut dhe në rajon. Hetimi për vrasjen e dyfishtë filloi gjatë mandatit të Oliver Spasovskit, ish-ministër i LSDM-së, të cilit Bojmacaliev ishte shef i kabinetit.
Toshkovski e problematizoi edhe “krizën e pasaportave” – ai akuzoi ish-udhëheqjen e MPB-së për keq menaxhim të dhënies së dokumenteve personale, mungesë formularësh, organizim të dobët në punkte. Në një intervistë për MIA-n, Toshkovski vlerëson se qeveria teknike funksionon në mënyrë katastrofike, duke theksuar se “obligimet themelore ligjore që duhet t’i respektojë, nuk i respekton”.
Qeveria anuloi pesë vendimet e Toshkovskit për rishpërndarjen e personelit. Bojmacaliev e mohoi Toshkovskin. “Me ardhjen e qeverisë teknike u krijua një imazh se Spasovski para se të mos bënte asgjë me të, gjithçka filloi me Pançe Toshkovskin, ai e zgjidhi problemin edhe pse tha se nuk kishte shkop magjik. Ishte një lajm i rremë që u plasua në publik se nuk ka modele, se ka kaos, se dikush po pengon dikë. Jam kritikuar për pranimin e formularëve në pikën kufitare ‘Bogorodicë’, por ka shumë njerëz të cilëve ua anulova lajmin e rremë se nuk ka formularë”, tha Bojmacaliev.
PARA, AKUZA, DEMANTE
Përplasje të ngjashme ka në ministritë e punës dhe politikës sociale dhe të bujqësisë. Ministri në qeverinë teknike, Gjoko Vellkovski (VMRO-DPMNE) akuzoi më shumë se 2000 pagesa të paligjshme të ndihmës së garantuar dhe pensionit social përmes ministrisë dhe kërkoi përgjegjësi. Sipas tij, me këto pagesa buxheti i shtetit dëmtohet për më shumë se 18 milionë denarë në muaj. “Shërbimet inspektuese të Ministrisë tashmë janë duke vepruar. Pas pranimit të raporteve të tyre, do të kontaktojmë me të gjitha institucionet kompetente për të gjetur përgjegjësinë dhe për të ndërmarrë të gjitha masat e nevojshme për këtë situatë”, tha Vellkovski në një konferencë për media.
Para tij ishte Jovanka Trençevska (LSDM), e cila tani është zëvendësministre shtesë. Ajo mohon akuzat për pagesa të paligjshme. “Edhe një herë ministri pa pasur informata konkrete me procesverbal të plotësuar, fakte dhe prova, del në publik dhe përdoret me akuza të rrejshme, të cilat përndryshe janë pjesë e informacioneve të punës së deritanishme të ministrisë”, shkruan në përgënjeshtrimin nga Trençevska.
Zëvendësministri shtesë i Bujqësisë, Cvetan Tripunovski (VMRO-DPMNE), akuzoi ministrin Ljupço Nikollovski (LSDM) se ka ndarë 2.5 milionë euro jashtë procedurës. Sipas tij, një zyrtar në të njëjtën kohë është përgjegjës për miratimin, ekzekutimin dhe kontrollin e shpenzimeve buxhetore të mjeteve, gjë që është në kundërshtim me të gjitha aktet e kontrollit financiar, duke lënë hapësirë për të ndikuar në mënyrën e shpërndarjes së mbi 2.5 milionë eurove para të popullit. Nikollovski i hodhi poshtë akuzat. Ai tha se pagesa e mjeteve nga ministria bëhet sipas procedurave dhe se nuk ka selektivitet në shpërndarjen e parave.
