Më 11 korrik, mijëra kubanë kanë marrë pjesë në protesta të rralla kundër qeverisë komuniste të shtetit ishullor në Karaibe, ku shumë të rinj kanë brohoritur “Poshtë diktatura” dhe “Liri”. Presidenti Miguel Diaz-Canel u ka bërë thirrje mbështetësve të tij që të “luftojnë” demonstruesit në Havanë.
Sipas lajmeve në mediat e rajonit, në qytezën San Antonio de los Banos në largësi prej 33 kilometrash nga kryeqyteti Havana dhe rajonet tjera të vendit, qindra persona organizuan protestë anti-qeveritare.
Protestuesit reaguan ndaj presidentit Miguel Diaz-Canel duke brohoritur me slogane “Poshtë diktatura”, “Duam liri”.
Presidenti Diaz-Canel thirrje popullit të mbrojë revolucionet
Diaz-Canel, duke iu drejtuar popullit nëpërmjet televizionit dhe radios kombëtare, i bëri thirrje popullit të mbrojë revolucionet e Kubës. “Nuk do të dorëzojmë sovranitetin e atdheut, të gjithë revolucionarët i ftojmë të dalin në rrugë për të mbrojtur revolucionin në çdo vend”, tha ai.
Diaz-Canel akuzoi administratën e SHBA-së për shkaktimin e paqëndrueshmërisë politike në Kubë gjatë pandemisë dhe përçarjen e ekonomisë duke zbatuar një bllokadë.
