Kryeministri i Shqipërisë, Edi Rama, e ka quajtur aspak të arsyeshëm përshkallëzimin e situatës në veri të Kosovës, derisa i ka bërë thirrje presidentit serb, Aleksandar Vuçiq, “të mos ushqejë me asnjë lloj justifikimi grupe të caktuara në veriun e Kosovës”.
Gjatë një konference për media me kryeministrin spanjoll, Pedro Sanchez, i cili po qëndron në Tiranë në kuadër të turneut në rajon, Rama tha se Qeveria e Kosovës “ka të drejtën dhe detyrën për të ushtruar sovranitetin territorial që buron nga një pavarësi në administrimin e shtetit”.
“Unë i bëj thirrje autoriteteve në Beograd dhe presidentit serb që të mos ushqejnë me asnjë lloj justifikimi dhe me asnjë lloj alibie grupe të caktuara në veriun e Kosovës që për arsyet e tyre i kundërvihen zbatimit të një marrëveshjeje”, tha Rama.
Reagimi i Ramës erdhi pas një dite përshkallëzimit të tensioneve në Kosovë, ku vendimi i Qeverisë së Kosovës për të zbatuar reciprocitet me Serbinë për targat e veturave dhe dokumentet e udhëtimit për qytetarët serbë u kundërshtua nga serbët lokalë, të cilët vendosën barrikada në pjesën veriore të Kosovës.
Dy pikëkalimet kufitare në veri të Kosovës me Serbinë – Jarinjë dhe Bërnjak – u mbyllën përkohësisht për shkak të tensioneve.
Të shqetësuar për një përshkallëzim, me kërkesën e Shteteve të Bashkuara, Qeveria e Kosovës u pajtua që ta shtyjë zbatimin e dy vendimeve deri më 1 shtator, por vetëm pasi të hiqen të gjitha barrikadat.
Ndërkohë, kryeministri spanjoll, Pedro Sanchez, tha se Spanja nuk e njeh pavarësinë e Kosovës sepse shpallja e saj, sipas tij, ka shkelur të drejtën ndërkombëtare.
“Ne mendojmë që është një deklaratë e njëanshme për pavarësi, ky është mendimi, ky është opinioni i Qeverisë spanjolle, me gjithë respektin që kam për opinionin e Qeverisë shqiptare. Ne mendojmë që është shkelur e drejta ndërkombëtare”, tha Sanchez.
“Nuk mund te jemi në favor të këtij pranimi, me gjithë respektin që kemi për popullin shqiptar”, shtoi Sanchez.
Kryeministri spanjoll se ky qëndrim kundër pavarësisë së Kosovës, “nuk do të thotë që nuk e nxisim dialogun me Prishtinën për t’u afruar ndaj BE-së”.
Spanja është njëra nga pesë shtetet e Bashkimit Evropian dhe katër shtetet e NATO-s që nuk e njeh pavarësinë e Kosovës, të shpallur më 2008.
Së bashku me Rumaninë, Greqinë, Sllovakinë dhe Qipron këto shtete e mohojnë shtetësinë e Kosovës duke u thirrur në të drejtën ndërkombëtare ndërkohë që ballafaqohen me lëvizje separatiste brenda shteteve të tyre, apo kanë marrëdhënie tradicionale me Serbinë.
Mosnjohja nga vendet anëtare të NATO-s dhe BE-së paraqet pengesën kryesore për Kosovën për integrime në këto dy organizata ku vendimet për zgjerim merren me konsensusin e të gjithë anëtarëve. /REL/
