Shifrat që tregojnë mbështetjen e shumicës për presidentin rus, Vladimir Putin, janë një “falsifikim i plotë” dhe tregojnë se votat janë manipuluar, tha një ekspert perëndimor.
Callum Fraser, bashkëpunëtor i sigurisë ruse dhe euroaziatike në Institutin Mbretëror të Shërbimeve të Bashkuara, tha se votat e brendshme në krahasim me ato jashtë vendit “demonstrojnë shkallën e manipulimit të votave në Rusi”.
Sipas Fraser, sondazhet jashtë Rusisë tregojnë se Vladislav Davankov kishte siguruar shumicën e votave, shkruan skynews.
“Rezultatet e pritshme që tregojnë 89 për qind mbështetje për Putinin janë një trillim i plotë. Disa burime sugjerojnë se Putini siguroi rreth 55 për qind të votave të brendshme”, tha ai.
Fraser gjithashtu tha se votimi elektronik “me gjasë është një nga mashtrimet më të mëdha zgjedhore”.
Kjo pasi nga sistemet elektronike nuk ka asnjë mënyrë për të verifikuar fletat e votimit. Edhe kompania e lidhur me sistemin “ka lidhje të ngushta” me shtetin rus.
“Dëshmitë e aktivitetit të dyshimtë të votimit elektronik janë parë në disa rajone të largëta lindore si Kamçatka ku pjesëmarrja e votuesve vetëm ditën e parë ishte 80 për qind”, tha Fraser.
Siç bëhet e ditur, njerëzit në pjesët e okupuara të Ukrainës janë detyruar të votojnë “nën kërcënimin e armëve”.
Disa prej tyre kanë treguar rezistencë përmes përpjekjeve për të prishur fletëvotimet dhe për të sulmuar qendrat e votimit, ndërkohë që ka pasur “pjesëmarrje të konsiderueshme” në protestën kundër Putinit.
Ndryshe, shqetësimi kryesor mbetet se Kremlini “po i detyron me sukses rusët t’i nënshtrohen autoritetit të Putinit”. /Telegrafi/
