Janë bërë ndryshimet në Konceptin për arsimin fillor, nevojën e të cilit e kanë vënë në dukje ekspertët dhe opinioni i gjerë në periudhën e kaluar, ndërsa veçanërisht mësimdhënësit e shkollave fillore. Konform sugjerimeve të dorëzuara gjatë periudhës në të cilën Koncepti u hodh për diskutim publik, Byroja për Zhvillimin e Arsimit ndërhyri dhe përgatiti përmbajtjen e re të avancuar, përcjell Nistori.
Kështu thuhet në njoftimin e Ministrisë për Arsim dhe Shkencë, ndërsa shtojnë se ndryshimet lejojnë kthimin e disiplinave shkencore të Historisë, Gjeografisë, Biologjisë, Fizikës dhe Kimisë si lëndë të veçanta në periudhën e tretë edukativo- arsimore të arsimit fillor (klasa e shtatë, e tetë dhe e nëntë), duke pasur parasysh se më parë Koncepti parashikonte integrimin e tyre me udhëzime të përcaktuara në mënyrë të paqartë për realizimin e orëve por edhe shkurtim të shumë përmbajtjeve të cilat janë me rëndësi të jashtëzakonshme për nxënësit e moshës përkatëse.
“Si rezultat i ndryshimeve në Konceptin, në periudhën në vazhdim do të përgatitet edhe plan i ri Mësimor për arsimin fillor, por edhe programe të reja mësimore për lëndët përkatëse në klasën e shtatë, tetë dhe të nëntë, të cilat do futen në etapa duke filluar nga viti shkollor 2025/2026, si dhe në dy vitet shkollore në vazhdim. Ministria e Arsimit dhe Shkencës shpreh mirënjohjen për të gjithë pjesëmarrësit e interesuar shoqërorë, të cilët kontribuuan me sugjerimet e tyre në avancimin e përmbajtjes së Konceptit për arsimin fillor, si dhe për Byronë për Zhvillimin e Arsimit, e cila është bartëse e të gjithë procesit. Gjithashtu vazhdon puna transparente, me përfshirjen dhe pjesëmarrjen aktive të të gjithë pjesëmarrësve të interesuar në krijimin e ndryshimeve arsimore”, thuhet në njoftimin e lëshuar nga Ministria e Arsimit dhe Shkencës (MASh).
