Komisioni Qendror i Zgjedhjeve (KQZ) ka pranuar peticionet e nënshkruara nga qytetarët për shkarkimin e kryetarëve të katër komunave në veri të vendit, në Leposaviq, Zubin Potok, Mitrovicë të Veriut dhe Zveçan.
Pas pranimit të peticioneve, KQZ duhet të bëjë verifikimin e nënshkrimeve për të vazhduar me pas me procedurat tjera.
Analisti Arton Demhasaj në një deklaratë për Telegrafin ka shpjeguar disa nga hapat që duhet ndërmarrë tashmë nga KQZ.
“Pas mbledhjes së nënshkrimeve, Komisioni Qendror i Zgjedhjeve e ka për obligim me i verifiku nënshkrimet dhe të vlerësojnë se a përbëjnë 20 % të listave të votuesve në komunat në veri. Dhe nëse veç vërtetohet se janë 20% atëherë brenda 45 ditësh KQZ është e obliguar me organizu ‘referendumin’”, ka thënë ai.
“Në referendum duhet të marrin pjesë të paktën 50% dhe duhet të gjithë të votojnë pro shkarkimit të kryetarëve të komunave, nëse ndodhë kjo atëherë KQZ fillon procedurat për procesin zgjedhor”, ka theksuar ai.
Ndryshe, kryetari i KQZ-së, Kreshnik Radoniqi para disa ditësh ka deklaruar se procesi i verifikimit do të zgjasë disa ditë.
“Konfirmojmë se kemi pranuar peticionet prej katër komunave dhe verifikimi i nënshkrimeve do të bëhet ditëve në vijim. Ka numër të madh të nënshkrimeve dhe nevojitet kohë për konfirmim”, ka thënë Radoniqi.
Kryetarët shqiptarë u zgjodhën në prill të vitit 2023, në zgjedhjet që u bojkotuan nga serbët.
Nisja e detyrës së tyre nxiti tensione në fund të majit të vitit të kaluar, të cilat kulmuan në Zveçan, pasi protestuesit serbë u përleshën me pjesëtarët e misionit paqeruajtës të Organizatës së Traktatit të Atlantikut Verior (NATO) në Kosovë – KFOR.
Bashkësia ndërkombëtare ka kërkuar uljen e tensioneve dhe shpalljen e zgjedhjeve të reja në katër komunat në veri të Kosovës.
Peticionet për largimin e katër kryetarëve janë nënshkruar edhe nga përfaqësuesit e Listës Serbe, parti që bojkotoi zgjedhjet dhe largoi përfaqësuesit e saj nga institucionet e Kosovës, duke nxitur edhe largimin e serbëve të tjerë.
Por, në mesin e tetorit të vitit 2023, kjo parti deklaroi se ishte e gatshme të merrte pjesë në zgjedhjet në komunat në veri, pa vendosur asnjë kusht për pjesëmarrje në zgjedhje, siç kishte bërë më herët.
Ky qëndrim i kësaj partie u mor pasi presidenti serb, Aleksandar Vuçiq, u bëri thirrje përfaqësuesve serbë në veri të Kosovës që të inicionin mbajtjen e zgjedhjeve të reja.
