Shërbime të këqija të kujdesit shëndetësor, transportit publik, ajri i ndotur, korrupsioni në administratën lokale, mungesa e jetës kulturore… të përkeqësuara ndjeshëm pesë vitet e fundit, e radhisin Shkupin si një nga dhjetë kryeqytetet më të këqija për të jetuar në Evropë. Në raportin e Komisionit Evropian – për cilësinë e jetës në qytetet evropiane 2023 pasqyrohen të dhënat e sondazhit të kryer me qytetarë të 83 qyteteve, ku në shumë zëra Shkupi veçohet për pakënaqësitë më të thella, nën mesataren e vendeve të tjera.
Përvojat dhe opinionet e shprehura të qytetarëve krijojnë në këtë raport perceptimin për Shkupin si një qytet ku qytetarët e kanë të vështirë të përballojnë jetesën. Nëse pothuajse nëntë në dhjetë persona (87 %) në qytetet evropiane të përfshirë në anketë janë të kënaqur me jetesën në qytetin e tyre, sidomos në qytetet e BE, EFTA dhe Mbretërinë e Bashkuar, në Ballkanin Perëndimor dhe Turqi jetojnë njerëzit më pak janë të kënaqur në qytetet e tyre, shkruan gazeta Koha.
Nëse thuajse tetë në dhjetë persona (72 për qind) e shkupjanëve në vitin 2023 deklarojnë se nuk janë të kënaqur me jetën në qytetin e tyre, krahasimi që bën studimi me vitin 2019, e veçon Shkupin si një prej qyteteve me rënien më të thellë të pritshmërive më pesë vitet e fundit.
“Është interesante se Beogradi dhe Shkupi janë ndër 10 qytetet me nivelet më të ulëta të kënaqësisë, që do të thotë se këto qytete arritën të zvogëlojnë një pjesë të hendekut me qytetet me shkallë të lartë të kënaqësisë së banorëve”, vërehet në studimin e KE. Një rënie e madhe e kënaqësisë është edhe në aspektin kulturor, ku “qyteti që regjistron uljen më të lartë të nivelit të kënaqshmërisë është Shkupi (MK, 56 %, -10 pp), duke shënuar rezultate të konsiderueshme nën mesataren e anketës. Shkupi po ashtu veçohet në raport sa i takon shërbimeve shëndetësore, me thuajse 3 në 10 qytetarë të kënaqur, raporton Koha.
“Në skajin tjetër të spektrit, në qytetet në 10-shen e fundit, më pak se gjysma e të anketuarve janë të kënaqur me shërbimet e kujdesit shëndetësor në dispozicion në qytetin e tyre Shkup (MK, 27 %), Miskolc (HU, 35 %) dhe Podgorica (ME, 36 %) kanë tre nivelet më të ulëta të kënaqësinë. Ndërsa qytetet e tjera nuk pësuan ndryshime të rëndësishme ndërmjet 2019 dhe 2023, disa nga ato në fund raportojnë dallime të rëndësishme në nivelet e kënaqësisë në vitin 2023, siç është rasti Miskolc (HU, 35 %, – 6 pp) dhe Shkupi (MK, 27 %, – 8 pp), i cili është ende qyteti me nivelin më të ulët të kënaqësinë”, vëren raporti. Në të gjitha qytetet, perceptimi më i lartë i korrupsionit është në Beogradi (RS) dhe Zagrebi (KR), ku pothuajse nëntë nga dhjetë banorët pajtohen se ka korrupsion në pushtetin lokal të qytetit të tyre, e ndjekur nga afër nga Shkupi (MK), Bukureshti (RO), Roma (IT) dhe Podgorica (ME), me rreth tetë nga dhjetë banorët pajtohen. Në skajin tjetër të spektrit, me dy nga dhjetë banorë që pajtohen se ka korrupsion në administratën publike, Zürich (CH) dhe Kopenhagen (DK) janë qytetet me nivelet më të ulëta të korrupsionit të perceptuar, të ndjekura nga Rennes (FR), Groningen (NL) dhe Aalborg (DK).
“Thuhet se cilësia nuk është kurrë aksidentale – kjo varet nga përpjekjet inteligjente. Kjo është dyfish e vërtetë për cilësinë e jetës, e cila varet në mënyrë thelbësore nga lehtësitë dhe mundësitë në vendin ku jetojmë. Komoditeti dhe mundësitë nuk ndodhin rastësisht – përpjekjet inteligjente nga qytetet e Evropës janë thelbësore… Pra, është inkurajuese të lexosh se cilësia e jetës në qytetet evropiane mbetet e lartë: pothuajse nëntë në dhjetë njerëz raportojnë të kënaqur me jetën në qytetin e tyre. Dhe kënaqësia në qytetet lindore të BE-së vazhdon të arrijë mesataren. Megjithatë, ka ende punë për të bërë. Ka pasur një rënie të kënaqësisë në qytetet perëndimore të BE-së. Dhe ka ende një hendek Veri/Jug, me kënaqësinë më të ulët të raportuar në Jug – dhe veçanërisht në qytetet e anketimit jashtë BE-së”, shkruan komisionerja për kohezionin dhe reformat Elisa Ferreira.
