Pasi mediat raportuan se Asmir Jahoski, pronari i kompanisë “Pucko Petrol”, i cili ishte në paraburgim në burgun e Shutkës deri një muaj më parë, është parë dje në Stamboll të Turqisë, ku ka marrë pjesë në një dasmë, reagoi partia në pushtet VMRO-DPMNE.
“Asmir Jahoski, i cili dëmtoi buxhetin e shtetit me një shumë të pabesueshme prej 167 milionë eurosh dhe është nën hetim, aktualisht po argëtohet në Bosfor. Pasi u vu në arrest shtëpiak për krimin e pastrimit të parave dhe të ardhurave të tjera nga blerja e mazutit me cilësi dhe origjinë të dyshimtë, djali i deputetit të BDI-së, tani mund ta shohim në media se është në Bosfor të Turqisë. Gjyqtarët e zgjedhur nga BDI dhe LSDM ia hoqën paraburgimin dhe i konfiskuan pasaportën, sepse ai dha miliona si garanci se nuk do të ikte. Tani lind pyetja: si është ai në Turqi ku shpenzon milionat që përvetësoi?”, pyet partia në pushtet.
Kujtojmë se më 6 maj, Gjykata e Apelit pranoi që Asmir Jahoski, pronar i Pucko Petroll të lirohet nga paraburgimi duke pranuar një garanci prej 986,540 eurosh, duke vendosur një hipotekë mbi pasurinë e patundshme në favor të shtetit dhe me një shumë shtesë prej 72 milionë denarësh. Gjykata e Apelit informoi gjithashtu se ndaj Jahoskit janë vendosur masa kujdesi dhe se pasaporta e tij është konfiskuar.
ur u mor vendim për Jahoskin, nga gjykata thanë se kanë parasysh propozimin pozitiv të marrë më parë nga Prokuroria Themelore Publike për Ndjekjen e Krimit të Organizuar dhe Korrupsionit Shkup dhe mendimin e Prokurorisë së Lartë Publike Shkup për të mbështetur ankesën e të dyshuarit, duke pranuar garancinë e ofruar.
“Pjesa e garancisë së ofruar dhe e pranuar në para prej 72,000,000 denarësh përfaqëson një shumë monetare të barabartë me dëmin e supozuar që dyshohet se i dyshuari e ka kryer në ngjarjen konkrete penale”, thuhet në njoftim.
Gjykata e Apelit tha se vendimi me arsyet do të publikohet i plotë në faqen e internetit të gjykatës në përputhje me Ligjin për Menaxhimin e Lëvizjes së Lëndëve në Gjykata.
