Tetovë, demolohen stacionet e autobusëve

    Krahas shumë problemeve me të cilët përballet transporti publik në Tetovë, një dukuri tjetër shqetëson autoritetet e kësaj ndërmarrje. Kohëve të fundit, nga kjo ndërmarrje kanë denoncuar dëmtimin e pajisjeve në stacionet ku qytetarët presin autobusët. Këta stacione shpesh herë demolohen në mënyrë të pandërgjegjshme. Këta sjellje do të sanksionohen, paralajmërojnë nga Ndërmarrja Publike Tetova Transport.

    “Kjo është sjellje skandaloze dhe e pamatur e qytetarëve të Tetovës. Njëra nga ulëset është e vjedhur. Si ndërmarrje, ne përpiqemi t’i sigurojmë stacionet me ulëse ku ju si bashkëqytetarë të pushoni duke pritur autobusët. Fatkeqësisht, kjo padyshim që e shqetëson dikë. Pra,ne shohim këtë pamje të shëmtuar të sjelljes së pacivilizuar. Edhe një herë do të përmendim se kjo sjellje do të sanksionohet”, thonë nga Ndërmarrja Publike Tetova Transport.

    Nga kjo ndërmarrje theksojnë se përveç këtyre problemeve, sfidë paraqet edhe komunikacioni i stërngarkuar në rrugët e Tetovës ku drejtuesit e autobusëve shpesh herë përballen me rrugë të bllokuara. Nga kjo ndërmarrje nuk kanë munguar thirrjet që sa më shumë të shfrytëzohet transporti publik dhe në këtë mënyrë të mos bllokohet edhe komunikacioni.

    “Shfrytëzimi i transportit publik është e mirë e përgjithshme të cilin duhet ta shfrytëzojmë të gjithë. Bashkërisht mund të kontribuojmë edhe në uljen e ndotjes së ajrit si dhe kaosin në komunikacion. Me autobusë cilësor dhe praktik, Ndërmarrja Publike ‘Tetova Transport’, ofron rehati dhe siguri për lëvizje të qytetarëve. Duke shfrytëzuar transportin publik ju gjithashtu reduktoni konsumin nëpër makinat tuaja. Në këtë mënyrë nuk bllokohet edhe komunikacioni por as nënstacionet e autobusëve nga shofer të pandërgjegjshëm. Me çmim të lirë të biletave më mirë merrni transportin publik sesa të vozisni makinat tuaja”, qëndron në një apel të kësaj ndërmarrje.

    Nga Komuna e Tetovës thonë se vonesa e autobusëve nuk është për shkak të pakujdesisë së shoferëve, por është si pasojë e automjeteve të parkuara që vazhdimisht bllokojnë qarkullimin nëpër qytet. Disa herë në këtë drejtim është kërkuar asistencë e policisë për të evituar këta probleme në rrugët e Tetovës.

    ”Të gjitha nënstacionet bllokohen rregullisht nga drejtues të pakujdesshëm që mendojnë se mund të parkojnë në nënstacionet e autobusëve sa herë të duan. SPB-Tetovë kishte tentime për të kontrolluar, por edhe kjo nuk pati ndonjë efekt të veçantë”, pohojnë nga Ndërmarrja Publike -Tetova Transport.

    Vendosja e transportit publik në Tetovë ishte një nga kërkesat e kamotshme të qytetarëve të Tetovës dhe të shoqërisë civile, si masë për të evituar kaosin në trafikun rrugor por edhe ndotjen enorme në këtë qytet. Megjithatë, edhe funksionimi i transportit publik është përcjellur me shumë probleme. /koha/

    Lajmi Paraprak

    Zejtarët në Maqedoni po mbijetojnë me forcat e fundit

    Lajmi i rradhës

    KU INVESTOHEN PARATË E MËRGIMTARËVE NË RMV!

    Lajme tjera

    Bashkohu

    Informohu në kohë