“Marrëveshja e Prespës është e qartë në lidhje me përdorimin “erga omnes” të emrit të shtetit dhe është e krahasueshme për sa i përket detyrimit kushtetues që kemi të gjithë. Emri kushtetues i shtetit është Republika e Maqedonisë së Veriut dhe çdo përdorim i emrit tjetër është jashtë Kushtetutës, bëhet i parëndësishëm në raport me Marrëveshjen e Prespës”.
Kështu tha ministri i Punëve të Jashtme në Qeverinë teknike, Bujar Osmani. Ai tha se i jep “këshilla falas qeverisë së re”.
“Ju mund të keni qenë kundër, mund të jeni kundër, por është realitet, është pjesë e rendit tonë kushtetues, pjesë e Kushtetutës dhe duhet respektuar”, tha ai.
Për sa i përket respektimit të dispozitave të marrëveshjes për përdorimin e emrit, Osmani ka theksuar se nuk ka vend për interpretime të ndryshme të Marrëveshjes së Prespës.
“Sipas Marrëveshjes së Prespës, mbiemri maqedonas mund të përdoret vetëm në kontekst etnik, e jo në atë shtetëror. Çdo gjë që është maqedonase i referohet komunitetit etnik maqedonas dhe prandaj mendoj se ato dispozita duhet të respektohen sepse hapin çështje të reja. E njëjta gjë është edhe për emrin e shtetit dhe mendoj se raporti më i saktë është të thuash që mund të kemi, kemi pasur dallime, por ky është realiteti”, tha Osmani.
Ai sot informoi se në Samitin e krerëve të shteteve dhe qeverive të pjesëmarrësve të Procesit të Bashkëpunimit të Evropës Juglindore (PBEJL), i cili po mbahet më 13 dhe 14 qershor në Shkup, do të marrë pjesë edhe zëvendësministrja greke e Punëve të Jashtme, Alexandra Papadopoulou, me të cilën do të kenë një takim dypalësh ku do të diskutojnë, siç tha ai, “të gjitha çështjet me interes dypalësh”.
