Raportime për bodrume të vërshuara, dru të rënë, automobilë të dëmtuar pas motit të ligë në rajonin e Shkupit dhe Tetovë
Raportime për oborre të vërshuara, bodrume, shtëpi, dru të rënë, shtylla elektrike dhe automobilë të dëmtuar janë marrë në Numrin e vetëm për raste urgjente pas motit të ligë që pasdite dhe gjatë natës i kaploi rajonin e Tetovës, Shkupit dhe Kumanovës, përcjell Nistori.
Më herët Qendra për Menaxhimin e Krizave (QMK) informoi se nga Qendra Rajonale e Tetovës është raportuar për bllokim të rrugës lokale. Mbrëmë, pas reshjeve të dendura në formë stuhie, në Shtabin e Krizave të Komunës së Tetovës është marrë informacion për bllokim të rrugës nga Sellca në Vejcë në Malin Sharr. E pakalueshme ishte edhe një pjesë e bulevardit “Bllagoja Toska” afër kazermës së Tetovës, që është plot me ujë dhe kishte një automjet të bllokuar.
“Kanalizime të bllokuara ka edhe në pjesën e epërme të qytetit dhe në Reçicë të Madhe, si dhe një sasi e madhe uji ka hyrë në shtëpi private, oborre dhe podrume. Shtabi Komunal i Krizave është aktiv dhe pret ndërhyrje në vendet e krizave, ndërsa nga QMK-ja gjithashtu, janë njoftuar në Ndërmarrjen Publike Komunale (NPK) Kanalizim nga Tetova, të cilët kanë informuar se do të dërgojnë persona për ndërhyrje. Situata është duke u monitoruar”, informoi QMK.
Më herët, QMK-ja bëri të ditur se janë përmbytur oborre dhe shtëpi në rrugën “Ivo Lola Ribar” dhe se ka vërshim të ujit nga kanalizimi në rr. “169” si dhe ka podrume të përmbytura nga shtëpitë familjare në rr.”172″ në drejtim të tregut të kafshëve në Tetovë. /Nistori/
