Kompanitë që merren me inteligjencën artificiale po përballen me një sfidë me të cilën njerëzit janë përballur që nga ekzistenca e tyre: si të ruajnë kujtimet.
OpenAI, Google, Meta dhe Microsoft janë përqendruar muajt e fundit në memorien, duke njoftuar përditësime që u mundësojnë chatbot-ëve të ruajnë më shumë informacione për përdoruesit, në mënyrë që t’u japin përgjigje më të personalizuara.
Ky hap konsiderohet si një zhvillim i rëndësishëm për të ndihmuar grupet kryesore në fushën e inteligjencës artificiale të tërheqin përdorues në një treg konkurrues të chatbot-ëve dhe agjentëve, si dhe si një mjet për të gjeneruar të ardhura nga teknologjitë më të avancuara.
Megjithatë, kritikët kanë paralajmëruar se ky zhvillim mund të keqpërdoret për të shfrytëzuar përdoruesit për qëllime komerciale dhe se mund të shkaktojë shqetësime lidhur me privatësinë, shkruan Financial Times.
Identifikimi i kontekstit nga të dhënat e jashtme
“Nëse ke një agjent që të njeh vërtet, sepse ka mbajtur mend bisedat, e gjithë shërbimi bëhet më tërheqës, dhe kur fillon të përdorësh një produkt të tillë, nuk kalon më te një tjetër,” tha Pattie Maes, profesoreshë në Laboratorin e Medias në MIT dhe eksperte për ndërveprimin mes njerëzve dhe inteligjencës artificiale.
Chatbot-ët me inteligjencë artificiale si Gemini i Google-it dhe ChatGPT i OpenAI-t kanë shënuar përparime të mëdha, transmeton Telegrafi.
Përmirësimet përfshijnë zgjerimin e dritares së kontekstit, që përcakton sa shumë biseda mund të mbajë mend një chatbot njëkohësisht, si dhe përdorimin e teknikave si gjenerimi për të identifikuar kontekstin përkatës nga të dhënat e jashtme.
Organizatat që merren me inteligjencën artificiale gjithashtu kanë përmirësuar memorien afatgjatë të modeleve AI duke ruajtur profilet dhe preferencat e përdoruesve, për të ofruar përgjigje më të dobishme dhe më të personalizuara.
Për shembull, një chatbot mund të mbajë mend nëse përdoruesi është vegjetarian dhe të përgjigjet në përputhje me këtë kur jep rekomandime për restorante ose receta.
Në muajin mars, Google zgjeroi memorien e Geminit duke përfshirë historikun e kërkimeve të përdoruesit, me kusht që personi të pranojë këtë, ndryshe nga kufizimi i mëparshëm që ishte vetëm bisedat me chatbotin, dhe planifikon ta zgjasë këtë në aplikacionet e tjera të Google në të ardhmen.
“Sa më mirë që chatboti ju njeh, aq më mirë do të ofrojë shërbimin”
“Ashtu si me një asistent njerëzor, sa më shumë të kuptojë qëllimet tuaja, kush jeni dhe çfarë është e rëndësishme për ju, aq më të mirë shërbim do të mund të ofrojë,” tha Michael Siliski, drejtor i menaxhimit të produkteve në Google DeepMind.
ChatGPT i OpenAI-t dhe chatbot-i i Metës në WhatsApp dhe Messenger mund të referohen në bisedat e kaluara, jo vetëm në sesionin aktual. Përdoruesit mund të fshijnë kujtime të caktuara në cilësimet dhe informohen kur modeli krijon një kujtim me një mesazh në ekran.
“Memoria ndihmon ChatGPT-n të bëhet më i dobishëm me kalimin e kohës duke i bërë përgjigjet më relevante”, njoftoi kompania OpenAI dhe shtoi se “ju gjithmonë keni kontroll dhe mund t’i pyesni ChatGPT-n se çfarë kujton për ju, të ndryshoni kujtimet e ruajtura dhe bisedat e kaluara, ose të çaktivizoni memorien në çdo moment”.
Për përdoruesit të bizneseve, Microsoft përdor të dhëna organizative për të informuar memorien, si email-e, kalendarë dhe dokumente të brendshme. Gjiganti teknologjik në prill nisi të ofrojë në disa pajisje funksionin Preview të veçorisë Recall, që regjistron aktivitetet e përdoruesve duke marrë pamje nga ekrani i kompjuterit. Përdoruesit mund ta çaktivizojnë këtë funksion ose të ndalojnë përkohësisht regjistrimin e ekranit.
Rritja e monetizimit përmes marketingut partner
Kur kjo veçori u njoftua për herë të parë në maj të vitit të kaluar, shkaktoi shqetësime në komunitetin e sigurisë kibernetike dhe tek të tjerë që e konsideruan të frikshme, gjë që çoi në disa vonesa të nisjes së saj.
Kompanitë e AI gjithashtu besojnë se memoria e përmirësuar mund të luajë një rol të madh në rritjen e monetizimit përmes marketingut partner dhe reklamave.
Drejtori ekzekutiv i Metës, Mark Zuckerberg, së fundmi tha se do të ketë një mundësi të madhe për shfaqjen e rekomandimeve të produkteve ose reklamave në chatbot-in e tyre.
Në muajin prill, OpenAI përmirësoi funksionalitetet e tij për blerje në ChatGPT për të shfaqur më mirë produkte, shërbime dhe recensione. Kompania i tha Financial Times se aktualisht nuk ka lidhje partneriteti.
Megjithatë, futja e kapacitetit më të madh të memories në modelet e mëdha gjuhësore ka shkaktuar gjithashtu shqetësime për privatësinë, pasi rregullatorët në mbarë botën po i vëzhgojnë me kujdes mënyrat se si modelet mund të manipulojnë përdoruesit për fitim.
Rreziku nga paragjykimet ose gabimet
Memoria e zgjeruar gjithashtu mund të çojë në atë që modelet përpiqen tepër të përshtatin përgjigjet e tyre me preferencat e përdoruesit, duke forcuar kështu paragjykimet ose gabimet.
OpenAI kërkoi falje pasi u zbulua se modeli i tij GPT-4o ishte tepër i komplimentueshëm dhe i ndikuar lehtë, dhe modeli u kthye në versionin e mëparshëm.
Në mënyrë më të përgjithshme, modelet e inteligjencës artificiale mund të “halucionojnë”, duke krijuar përgjigje të pavërteta ose të pakuptimta, dhe përjetojnë një “zhvendosje memorjeje” kur kujtimet bëhen të vjetruara ose kontradiktore, që ndikon në saktësinë.
“Sa më shumë që sistemi di për ju, aq më shumë mund të përdoret në qëllime negative — për t’ju bërë të blini diçka ose për t’ju bindur për besime të caktuara. Prandaj duhet të filloni të mendoni për interesat themelore të kompanive që ofrojnë këto shërbime,” tha Maes, profesoreshë në MIT.
