Qytetarët e Maqedonisë po hyjnë në vitin 2026 me një përmbajtje të theksuar dhe qëndrime të ndara lidhur me mirëqenien personale, ekonominë dhe stabilitetin global, tregon hulumtimi më i fundit i Asociacionit Ndërkombëtar “Gallup” (Gallup International Association – GIA). Pjesa më e madhe e qytetarëve (42.7%) nuk presin asnjë ndryshim në jetën e tyre, duke konsideruar se viti 2026 do të jetë i njëjtë me vitin e kaluar.
Optimizmi është i pranishëm te 28.9% e të anketuarve që besojnë në një vit më të mirë, ndërsa 25.8% frikësohen se viti 2026 do të jetë më i keq për ta personalisht. Këto shifra tregojnë për një diferencë shumë të ngushtë mes atyre që shpresojnë në përparim dhe atyre që janë pesimistë.
PROSPERITETI EKONOMIK: PESIMIZMI E ERRËSON
Sa i përket ekonomisë kombëtare, qëndrimet janë dukshëm më pesimiste: 36.1% e qytetarëve presin që viti 2026 të jetë vit i vështirësive ekonomike. Një përqindje pothuajse identike (36.2%) mendojnë se gjendja ekonomike do të mbetet e njëjtë. Vetëm 23.3% besojnë se vendin e pret prosperitet ekonomik. Kjo tregon se më shumë se një e treta e popullsisë frikësohet nga recesioni ose stagnimi ekonomik.
STABILITETI GLOBAL: BOTA MES TRAZIRAVE DHE STATUS QUO-së
Në lidhje me sigurinë globale dhe paqen në botë, mbizotëron mendimi se nuk do të ketë ndryshime të mëdha. Plot 42% mendojnë se bota do të mbetet e njëjtë si deri tani. Megjithatë, frika nga konflikte të reja është e pranishme, pasi 28% presin një vit “më të trazuar”, që është pak më shumë se 27% që shpresojnë për një situatë globale më paqësore.
KOSOVA MË OPTIMISTJA NË RAJON, BULLGARIA MË PESIMISTJA
Fqinjët e rajonit, në prag të vitit 2026, shfaqin kontrastet më të mëdha, ku përplasen optimizmi ekstrem dhe pesimizmi i thellë. Lider absolut për pritje pozitive mes fqinjëve është Kosova, ku 53% e qytetarëve besojnë se viti i ardhshëm do të jetë më i mirë, duke shënuar një rezultat neto shprese prej +30, një nga më të lartët në kontinentin evropian. Trende të ngjashme pozitive vërehen edhe në Shqipëri, e cila tradicionalisht ndjek këtë bllok vendesh optimiste.
Në të kundërt, pjesa tjetër e fqinjësisë zhytet në parashikime negative, e udhëhequr nga Bullgaria, e cila me një rezultat neto negativ prej -36 është ndër vendet më pesimiste në botë. Plot 51% e qytetarëve bullgarë presin një vit më të keq, ndërsa vetëm 15% shpresojnë në përparim. Gjendja është e ngjashme edhe te fqinjët e tjerë të rajonit, ku pesimizmi mbizotëron mbi shpresën.
Greqia shënon një rezultat neto negativ prej -23, ku 45% e të anketuarve përgatiten për një vit më të vështirë krahasuar me vitin e kaluar. Serbia dhe Kroacia gjithashtu ndodhen në zonën negative me rezultate neto përkatësisht -11 dhe -9. Në Serbi, 38% e qytetarëve parashikojnë një vit 2026 më të keq, ndërsa në Kroaci ky përqindje është 36%. Në këto vende dominon ndjenja e pasigurisë dhe shumica e qytetarëve mendojnë se ekonomitë e tyre do të përballen me vështirësi të reja.
Këto të dhëna i përcaktojnë qartë fqinjët e rajonit si një grup me dy skaje, ku hendeku mes shpresës në Kosovë dhe pesimizmit në Bullgari dhe Greqi është ndër më të mëdhenjtë e vërejtur në hulumtimin global “Fundi i Vitit”. Hulumtimi është realizuar në periudhën mes tetorit dhe dhjetorit 2025. Në secilin vend janë intervistuar zakonisht rreth 1000 të anketuar, mbi moshën 18 vjeç. /Koha/
