Autostrada Gostivar – Kërçovë pritet të përfundojë në fund të vitit 2029

“Është kënaqësi të shohësh përparim dhe rezultate të mira në ndërtimin e autostradës Gostivar–Bukojçan. Kemi një momentum të fortë: shteti po siguron logjistikën dhe fondet në kohë në fushën e shpronësimit, dhe ky ritëm i fuqishëm do të vazhdojë edhe në periudhën e ardhshme, në mënyrë që të mund të qarkullojmë në këtë autostradë deri në fund të vitit 2029″, deklaroi zëvendëskryeministri dhe ministri i Transportit, Aleksandar Nikoloski, përcjell Nistori.

Sot, së bashku me kryeministrin Hristijan Mickoski, të ngarkuarën me punë në Ambasadën e ShBA-së, Nicole Varnes, zëvendësministra, deputetë, kryetarë komunash dhe drejtorin e PESD-së, Koce Trajanovski, ata inspektuan punimet për ndërtimin e autostradës Gostivar Bukojçan.\

“Po punojmë intensivisht në këtë seksion të dytë, përkatësisht në autostradën që shtrihet nga Gostivari në Bukojçan, e cila duhet të lidhet me autostradën Gostivar–Tetovë, ndërsa në anën tjetër do të lidhet me autostradën që do të ndërtohet nga Bukojçani në Kërçovë. Prej andej lidhemi me autostradën drejt Ohrit dhe Strugës, e cila tashmë është në ndërtim. Pra, bëhet fjalë për të gjithë segmentin e autostradës në krahun perëndimor të Korridorit 8, një projekt që duhet të lidhë gjithë këtë rajon, të sjellë përfitime të mëdha ekonomike, më shumë biznes dhe shumë më tepër turistë”, tha Nikoloski.

Ai theksoi se procesi i shpronësimit është pothuajse 90 për qind i përfunduar, gjë që sipas tij është një tregues suksesi, ndërsa financimi sigurohet në kohë, çka mundëson zbatimin e projektit sipas planit. Gjithashtu, siç theksoi ai, sektori i ndërtimit ka shënuar një rritje historike prej 21 për qind.

“Ajo që më gëzon është se ndërtimtaria po rritet. Në tremujorin e tretë të vitit të kaluar, rritja ishte 21 për qind, gjë e paprecedentë në Maqedoninë e pavarur, dhe do të vazhdojmë me këtë ritëm edhe në periudhën e ardhshme. Obligimet që kishte shteti tashmë janë përmbushur: rreth 90 për qind e shpronësimit është përfunduar dhe deri më tani janë paguar rreth 470 milionë euro, që është një shumë e madhe për një buxhet si ai i Maqedonisë. Shteti siguron të gjithë logjistikën, ndërsa kompanitë mbetet të kryejnë punën e tyre. Jam i kënaqur që po qëndrojmë mbi një urë 40 metra të lartë. Ky projekt është i rëndësishëm për kompanitë ndërtimore maqedonase dhe për ato që do të përfshihen në të ardhmen, si dhe për Fakultetin e Inxhinierisë Civile, Fakultetin e Arkitekturës dhe brezat e ardhshëm, që të mësojnë nga projekte konkrete dhe reale”, theksoi Nikoloski.

Ai falënderoi kryeministrin Mickoski për mbështetjen ndaj këtij projekti dhe njoftoi një dinamikë të fortë punimesh, me synimin që autostrada të përfundojë deri në fund të vitit 2029, pa asnjë devijim nga afati. Ai shtoi se po punohet intensivisht edhe në autostradën Tetovë–Gostivar, si dhe në atë Prilep–Manastir.