Diskoteka “Pulse” në Koçan ka filluar punën, megjithëse nuk janë përmbushur kushtet minimale teknike për funksionimin e objektit, njoftoi Prokuroria në seancën e ditës së enjte të gjykimit për zjarrin në diskotekën e Koçanit, e cila paraqiti prova të siguruara nga Ministria e Ekonomisë dhe Sektori i Punës, Turizmit dhe Hotelierisë, raporton AIM.
Seanca e radhës është caktuar për më 1 korrik me prova materiale nga Prokuroria e Inspektoratit Shtetëror të Tregut dhe transkripte të thirrjeve telefonike.
Prokurorja Natasha Saramandova filloi të paraqiste prova, të cilat sipas saj lidheshin me rrethana relevante se si filloi funksionimi i objektit, edhe pse nuk plotësoheshin kushtet minimale teknike për funksionimin e objektit, por një prokurore tjetër vazhdoi pasi mbrojtja paraqiti një kërkesë në Gjykatë për të skualifikuar Saramandovën, për shkak të, siç deklaroi ajo, “sjelljes së anshme në prezantimin e provave duke përjashtuar elementë të provave që janë me rëndësi thelbësore”.
Kërkesa duhet të vendoset nga Prokurori Publik i Shtetit Nenad Saveski.
Pas kësaj, prindërit e fëmijëve që humbën jetën në zjarrin në diskoteken “Pulse” në Koçan, në shenjë revolte, u larguan vullnetarisht nga salla e gjyqit në Qendrën Korrektuese të Idrizovës.
“Natasha Saramandova është prokurorja më e mirë me prokurorin Darko, dhe ata janë shpresa jonë që e vërteta të zbulohet dhe të mësohet për ne prindërit, dhe për të gjithë publikun, në mënyrë që ata të mund të shohin se kush i vrau fëmijët tanë. Nëse e përjashtojnë prokuroren Natasha Saramandova, nuk mendoj se duhet të ketë as gjyq – tha nëna e të ndjerit Tomas”, Julia Zlatkova.
Aleksandar Naunov, në një deklaratë për mediat, theksoi se krijohet përshtypja se sa më shumë prova hapen dhe shpjegohet përmbajtja e tyre, aq më shumë fokusi zhvendoset nga thelbi në procedurë.
Ne, prindërit, kërkohet të kemi dinjitet dhe durim, theksoi Naunov, dhe e kemi bërë këtë që nga dita e parë, dhe në këmbim kërkojmë vetëm një gjë: që provat të paraqiten deri në fund, që publiku të dëgjojë të gjithë pamjen dhe që përgjegjësia të mos humbasë në procedura.
Në fillim të seancës dëgjimore, Gjykata shprehu ngushëllime familjes së të ndjerit Lupço Grnçishtanov, i cili ishte një nga të pandehurit në këtë rast, dhe informoi se me marrjen e njoftimit nga MPB, procedura penale kundër këtij të pandehuri po ndërpritet.
