Që nga shpallja e epidemisë në Gostivar, më 19 korrik, e deri më tani, autoritetet shëndetësore kanë regjistruar 1.149 raste të enterokolitit, i njohur edhe si infeksion gastrointestinal. Edhe pse ekspertët e shëndetësisë kanë paralajmëruar se numri real i të prekurve mund të jetë ndërmjet 4.000 dhe 5.000, pasi një pjesë e madhe e tyre nuk kanë kërkuar ndihmë mjekësore, Instituti i Shëndetit Publik (ISHP) i ka sqaruar Metës se shifra prej 1.149 rastesh bazohet vetëm në raportet zyrtare të dorëzuara nga mjekët pas diagnostikimit të pacientëve, përcjell Nistori.
“Kur një mjek diagnostikon një sëmundje infektive gjatë ekzaminimit, ai është i detyruar të plotësojë një raport. Analizat tona gjithmonë janë bërë, bëhen dhe do të bëhen vetëm mbi bazën e të dhënave zyrtare nga raportet për sëmundjet infektive, ashtu siç parashikon ligji. Gjatë korrikut na janë dorëzuar 497 raporte për enterokolit në Gostivar, ndërsa një numër shtesë është dorëzuar gjatë gushtit dhe do të përfshihet në buletinin e këtij muaji. Deri më sot, ISHP-ja ka pranuar 1.149 raporte nga Gostivari”, shpjegon epidemiologu Dragan Kocinski nga ISHP-ja.
Ndërkohë, Instituti i Shëndetit Publik ka publikuar buletinin për lëvizjen e sëmundjeve akute infektive, i cili përmban të dhëna për epidemitë e regjistruara në të gjithë vendin gjatë muajit korrik. Sa i përket situatës në Gostivar, në buletin thuhet se Qendra e Shëndetit Publik – njësia rajonale Tetovë/Gostivar – e ka klasifikuar atë si epidemi gastroenteriti.
“Epidemia u raportua më 19 korrik, me dyshimin për një epidemi me origjinë hidrike. U raportuan 140 persona të sëmurë dhe nëntë të hospitalizuar. Epidemia është ende aktive”, thuhet në buletin.
Më 17 korrik, Agjencia e Ushqimit dhe Veterinarisë (AUV) ndaloi përdorimin e ujit nga sistemi i ujësjellësit të Gostivarit, pasi inspektorët, së bashku me policinë dhe përfaqësuesit e Ministrisë së Mjedisit, konstatuan se në tubacionin kryesor ishte instaluar në mënyrë të paligjshme një pompë, përmes së cilës injektohej drejtpërdrejt ujë nga lumi Vardar.
Dy ditë më vonë, mikrobiologu Nikola Panovski deklaroi se në Gostivar duhej të shpallej epidemi gastroenteriti, duke theksuar se kishte rreth 1.500 raste të regjistruara me simptoma të njëjta dhe të paktën 5.000 persona të tjerë që nuk kishin kërkuar ndihmë mjekësore. Autoritetet shëndetësore më pas shpallën epideminë.
Banorët e Gostivarit, me të cilët kishte biseduar Meta, u shprehën të zemëruar dhe të zhgënjyer me situatën e krijuar me ujin, duke pretenduar se ajo ishte shkaktuar nga faktori njerëzor. Ata thanë se nuk u besonin institucioneve dhe se nuk do ta pinin ujin edhe nëse ai do të shpallej i sigurt për konsum.
Dy ditë pas raportimit të Metës, më 14 gusht, disa zyrtarë lokalë dhe shtetërorë pinë publikisht ujë nga një çezmë në Gostivar. Mes tyre ishin Zudi Xhelili, koordinator i Shtabit Lokal të Krizës dhe punonjës i Komunës së Gostivarit; Muhamed Ali, drejtor i Qendrës për Menaxhim me Kriza; Stojançe Angelov, drejtor i Drejtorisë për Mbrojtje dhe Shpëtim; Oliver Milanov, drejtor i Agjencisë së Ushqimit dhe Veterinarisë; si dhe Shaqir Zulbeari, drejtor i Qendrës së Shëndetit Publik në Gostivar.
Sipas autoriteteve, analizat kanë treguar se uji në Gostivar është i sigurt për konsum. Rezultatet e analizave, sipas tyre, kanë konfirmuar se uji i plotëson kriteret mikrobiologjike dhe bakteriologjike për përdorim.
