Ish-kryetari i Strugës, Ramiz Merko, u dënua me 5 mijë euro për vendosjen e pllakës përkujtimore në hyrje të ndërtesës komunale në Strugë në vitin 2024. Aktakuza e ngarkoi Merkon për nxitje të urrejtjes etnike dhe përçarjes mes banorëve të Strugës për shkak të vendosjes së pllakës me mbishkrimin „Shkolla fillore Kongresi i Manastirit, 1 shtator 1941 “ në hyrje të komunës.
” Nga i gjithë dokumentacioni rrjedh se pllaka është vendosur në ndërtesën e Komunës të përfaqësuar nga i pandehuri si kryetar i atëhershëm. Fakti i padiskutueshëm është se në këtë rast të veçantë nuk ka pasur asnjë pasojë, domethënë nuk ka pasur konflikt ose incident, në lidhje me atë që përfaqësonte pllaka. Meqenëse rezulton se kemi vetëm një formë themelore të veprës penale pa pasojë, dhe për këtë, në përputhje me paragrafin 2 të nenit 27, është parashikuar gjobë. Gjobë do të shqiptohet edhe në këtë rast. Në këtë rast të veçantë, gjoba është 100 gjoba ditore, me vlerën e gjobës ditore prej 50 eurosh, ose 5.000 euro në kundërvlerë në denarë.” – Deklaroi Jordan Jovanov-gjyqtar
Merko në deklaratën e tij tha se nuk ka bërë asnjë faj dhe se pllaka ishte vendosur nga Shoqata e Pensionistëve Shqiptarë në kuadër të akademisë vjetorë për Ditën e Alfabetit shqip.
“Nuk kam të bëj fare me vendosjen e ndonjë pllake në ndërtesën e Komunës së Strugës. U deklaruan edhe Shoqata e Pensionistëve Shqiptarë, dhe ata pranuan faktin se e vendosën pllakën në ditën kur mbanin akademi vjetore për Ditën e Alfabetit Shqip. E mora vesh vetëm kur erdhën inspektorët e Ministrisë së Kulturës dhe njoftuan kërkesën e tyre për të ndëshkuar Komunën e Strugës. Dhe ata që e nisën këtë procedurë vetë thanë se nuk kishte protesta dhe nuk kishte probleme me arsyen pse u vendos pllaka.” Tha Ramiz Merko – ish-kryetar i komunës së Strugës
Prokuroria Publike tha se nga provat e paraqitura dhe deklaratat e dëshmitarëve, ata besojnë se është vërtetuar se i pandehuri ka kryer vepër penale. Prandaj, ata propozuan që Gjykata ta shpallë atë fajtor. Avokati i Merkos, Igor Petkovski, kërkoi që Gjykata ta lirojë atë nga akuzat sepse prokurori i autorizuar nuk vërtetoi se i pandehuri e kreu vepër penale, dhe i pandehuri as nuk u pa dhe as nuk u dokumentua se kishte ngritur një memorial, që nxit urrejtje etnike dhe fetare. /Alsat/
