I MBETUNI

    Ndre Mjeda

    Edhè shtâza po gazmohet,
    Edhè bari mungullon ;
    N’shênd natyra gjith po çohet,
    Veç ti, i mjeri, po gjimon.

    Kâng’ e valle tui bashkue
    Shênd prei gojet gjithkush qet;
    Veç i vorfni tui dertue
    Porsi i huej â n’gjiní t’vet.

    Tui ankue për t’zeza t’veta
    Për gjith derë tui lyp’ kërset;
    Për ‘tê t’dhimtun kërkund s’gjeta:
    Porsi i huej â n’katund t’vet.

    Lodh’ e ûnshem, kúr vjen nata,
    N’prêhën t’nanës me shkue kujton;
    Edhè nana i diq e ngrata,
    E kush t’vorfnin s’e ngushllon.

    Bab’, oh! babë! sa herë ndo‘j trimit
    Do me i thanë tui derdhun lot;
    Po për têne â fjalë trishtimit,
    Â nji fjalë qi permênd kot.

    Për dhé t’vet tui dalë n’ushtríe
    Rrebtë qindroj i jati e diq;
    Sot i vorfni askund nji shpíe,
    Nji copë buk s’e gjên nder miq.

    Ah! ti njomë, o njomë e mjera,
    Dit’ e natë qi po vajton;
    Kund nder miq nuk t’çilet dera,
    Kërkush vajin s’ta pajton.

    Dit’ e natë pá buk e shpíe
    Shkote i vorfni andej e këndej,
    E prei t’pasunish zotníe
    Nji fjalë t’mirë kërkush s’ja kthej.

    Kû ké baben me t’ ndimue?
    Kû ké nanen me derdhë lot?
    Tý gjith robi t’ká harrue,
    Kërkush s’do me t’dalun zot.

    Tui rá bór, tui frye murrlani,
    Mjet dý vorreve si‘j lis,
    Afër gropës qi vet’ e bâni,
    Djali i vorfën u molis.

    Afër nanës u shtrue me fjetun,
    Afër babës kërkoj pushim;
    Kurrgjâ t’ngritin s’ká me e gjetun,
    T’xét e t’ ftoftë s’kan me pasë ndrrim.

    Me njatà qi veç e doshin
    Trupi i t’vocërrit pushoj;
    E n’lumní qi atà po gzoshin
    Shpírti i njomës fluturoj.

    Lajmi Paraprak

    Publikohen pamje që tregon sesi dëgjohet llava kur ngadalë lëviz nëpër ishull

    Lajmi i rradhës

    Bekim Sali: Beteja vazhdon, ia vlen për të mirën e banorëve të Çairit

    Lajme tjera

    Poezia e gjuhës shqipe

    Sabri Hamiti 1. PARAFJALA Gjithmonë kur ndodhemi në udhëkryq ekzistencial, sprovën e reflektimit e mbështesim te klasikët kombëtarë jo…
    Më tepër

    Bashkohu

    Informohu në kohë