Ambasadori i Bashkimit Evropian në vend Mihalos Rokas, përfaqësuesi i përhershëm i UNDP-së, Armen Grigorian dhe kryetari i Komunës së Resnjës, Jovan Tozievski, Ditën Botërore të Mjedisit Jetësor do ta shënojnë me fillimin e punëve të financuara nga BE-ja në vlerë prej 7 milionë euro, për rrjetet e grumbullimit të ujërave të zeza dhe impiantet për trajtimin e tyre në fshatrat në Pretor, Stenje, Kran, Dupeni i Poshtë, Brajçinë dhe Slivnicë.
Paradite, në një konferencë për shtyp në Pretor, ambasadori Rokas, përfaqësuesi i përhershëm i UNDP-së në vend Grigorian dhe kryetari i Komunës Tozievski do të informojnë për aktivitetet e projekteve në funksion të zgjidhjes bashkëkohore për ujërat e zeza në Prespë.
