Bashkimi Evropian sheh “konvergjencë” me Japoninë në të menduarit për inteligjencën artificiale gjeneruese (AI), tha një zyrtar i lartë të hënën.
“Unë shoh shumë konvergjencë në mënyrën se si ne e shikojmë inteligjencën artificiale dhe inteligjencën artificiale gjeneruese”, deklaroi për Reuters në një intervistë Vera Jourova, zëvendëspresidentja e Komisionit Evropian për Vlerat dhe Transparencën.
BE-ja është në ballë të rregullimit të teknologjisë në zhvillim me Aktin e saj të AI-së, ndërsa Japonia po shikon udhëzime më fleksibile sesa blloku për të nxitur rritjen ekonomike, ka raportuar Reuters, transmeton Telegrafi.
BE-ja dhe Japonia po thellojnë bashkëpunimin mbi teknologjitë si inteligjenca artificiale, siguria kibernetike dhe çipat që shihen si të rëndësishme për sigurinë ekonomike.
“Kohët e fundit kam qenë në Kinë dhe është një gjë krejtësisht ndryshe. Mund të diskutoj me partnerët tanë japonezë sepse nuk kemi pse t’i shpjegojmë njëri-tjetrit gjërat themelore”, tha Jourova në margjinat e një forumi mbi qeverisjen e internetit në Kioto.
Grupi i Shtatë fuqive industriale po diskuton udhëzimet për inteligjencën artificiale gjeneruese, një teknologji që po përballet me entuziazëm dhe shqetësim, sipas një procesi të vendosur në Hiroshima.
Diskutimet janë në rrugën e duhur për të nisur konsultimet mbi një kornizë për inteligjencën artificiale, por një kod sjelljeje për kompanitë e përfshira në inteligjencën artificiale ka nevojë për punë të mëtejshme, shtoi tutje Jourova.
