Rritja e çmimeve në mënyrë rapide në vendin tonë ka ndikuar edhe në uljen e standardit jetësor. Në këtë drejtim çmimet e larta ndikojnë edhe në sigurimin e ushqimeve të cilët konsumohen nga popullata. Në Dibër dhe rajon, sipas rrjetit tregtar, ka një ulje të shitjes të shumë prodhimeve e veçmas kur është në pyetje mishi. Konsumimi i mishit në qytet dhe fshatra është më i vogël dhe mishtoret informojnë se i’a dalin disi duke shitur mishin në tregjet jashtë Dibrës.
Të dhënat zyrtare të mishtoreve në Dibër thonë se dy vitet e fundit ka pësuar një ulje plasmani i mishit në qytetit dhe në vendbanimet rurale. Çmimet e larta të mishit edhe atë të viçit, lopës dhe qengjit tani pothuajse janë dyfishuar në krahasim me vitet më parë.
Sot mishi i viçit në mishtoret e Dibrës shitet nga 500 denarë për kilogram deri më 650 denarë, mishi i lopës afro 400 denarë kurse mishi i qengjit ka arritur një lartësi afro 700 denarë për kilogram. Pronarët e mishtoreve thonë se ata janë të detyruar që një pjesë të mishit ta plasojnë në tregjet e qytetarëve të vendit por edhe në Shqipëri. Çmimet e mishit nuk i përgjigjen xhepit të qytetarëve, thotë Amit.M nga Dibra. Janë çmime shumë të larta për të ardhurat modeste të një pjese të madhe të dibranëve. Prandaj i kuptoj pronarët e mishtoreve të cilët theksojnë se ka një ulje të shitjes të mishit. Popullata në një situatë të këtillë më shumë blejnë mish të bardhë, nëpër markete tregtare. Mishi i pulës i bardh zëvendëson mishin e viçit, thotë Amedan.Sh. poashtu nga Dibra. “Në tryezën e familjes time më pare ë konsumonim mishin tre herë në javë. Tani mishi i viçit është zëvendësuar me mishin e bardh meqë është shumë i lirë”, thotë ai.
Në një nga shitoret e mishit në Dibër takuam edhe shtetasin shqiptar Agim. F nga fshati Dovolan, bashkia e Peshkopisë. Ai tha se posedon një lokal shërbyes në fshatin e tij dhe mishin e siguron në mishtoret në Dibër. Poashtu na sqaron se shpesh herë meqë është një blerës i rregullt në një mishtore në Dibër, ka biseduar me pronarin i cili është i detyruar me çmimet më të ulët të plasojë mishin meqë blihet me sasi më të mëdha. Është një problem shumë i madh, thonë pronarët e mishtoreve në Dibër. Ata na informojnë se shpesh herë mishin nga Dibra shitet në Strugë, Ohër, Gostivar, Tetovë dhe Shkup nëpër restorantet e ndryshme, meqë janë të detyruar për shkak të uljes të interesimit për përdorimin e mishit nga ana e banorëve të komunave Dibër, Qendër Zhupë dhe Mavrovë Rostushë, por dhe mishi i viçave kanë një kualitet të lartë pasi ata rriten e ushqehen në natyrë dhe me ushqim bio. /Koha/
