Pak orë para natës së fundit të vitit, një pjesë e shitësve do të jenë në vendet e tyre të punës, për shkak të urdhrit që më 31 dhjetor të punohet deri në orën 20:00. Për t’u dalë në ndihmë “klientëve të vonuar”, megjithatë, pjesa më e madhe e tregtarëve do të punojë deri në orën 18:00, pasi siç thonë, klientët ua diktojnë orarin e punës. Meqenëse Viti i Ri bie në ditë pune (të mërkurën), ata që nuk janë furnizuar me produktet e nevojshme për tryezën festive do të mund ta bëjnë këtë deri në orën 20:00, por vetëm në marketet e mëdha që funksionojnë brenda qendrave tregtare. Të kujtojmë se më 1 janar, sërish vetëm ato do të jenë të hapura dhe do të punojnë me turn festash deri në orën 20:00, që do të thotë se vetëm aty do të mund të blini bukë dhe produkte të tjera.
Të hapura rregullisht do të jenë edhe marketet në pikat e karburanteve, por atje çmimet janë të paktën dyfish më të larta se në dyqanet e tjera. Edhe pse deri në Vitin e Ri kanë mbetur vetëm pak ditë, në dyqanet e vendit ende nuk ndjehet ethe të mëdha festive të blerjeve, ndërsa qytetarët janë të një mendimi se shtrenjtësia nuk u lejon të shpërdorojnë para.
Edhe pse java e fundit e dhjetorit është periudha kur euforia e Vitit të Ri arrin kulmin, tregtarët janë të zhgënjyer nga disponimi për shpenzim dhe thonë se gjithçka do të përqendrohet në fundjavën e fundit të këtij viti. Nuk ndihmojnë as dekorimet festive, as aksionet dhe zbritjet në supermarketet – me pak para nuk mund të shpenzohet tepër, shtojnë qytetarët me të cilët bisedoi gazeta Koha. Edhe pse nuk ka të dhëna të sakta për shpenzimet festive, ekspertët vlerësojnë se shuma do të jetë më e lartë se vitin e kaluar, sepse qytetarët detyrohen të shpenzojnë më shumë për shkak të inflacionit dhe rritjes së çmimeve.
Të gjithë pajtohen se, mesatarisht, qytetarët në dhjetor shpenzojnë më shumë se gjatë pjesës tjetër të vitit, por edhe në këtë sezon festiv vërehet qartë hendeku mes dëshirave dhe mundësive. Paga mesatare neto në tetor 2025 është 45.943 denarë, paga minimale 23.379 denarë, ndërsa pensioni mesatar 27.500 denarë. Inflacioni nuk është qetësuar, fuqia blerëse është e kufizuar dhe mbi 50 për qind e të ardhurave shkojnë për ushqim, gjë që na bën kampionë në rajon.
“Nëse shikoni strukturën, do të vini re një rritje pak më të madhe të faturave fiskale krahasuar me vitin e kaluar, por kjo nuk tregon se qytetarët po shpenzojnë më bujarisht, por se çmimet janë më të larta. Qeveria hapi hapësirë për rritje me pensionet e rritura dhe me një pjesë të pagave, por është zhgënjyese që ata që janë me pagë minimale do të mbeten të gozhduar në fund”, thonë ekonomistët. Tregtarët thonë se janë furnizuar me kohë me mallra dhe se dyqanet janë të mbushura me lloj-lloj delikatesash. Mishtoret ofrojnë mish qengji që kushton 600 denarë, gjelat e detit shiten deri në 1000 denarë, ndërsa mishi i viçit kushton pothuajse 800 denarë për kilogram.
Majonezi për sallatën e famshme ruse tashmë është në aksion, lakra turshi është gati, ndërsa ka zbritje edhe për mezet, pijet, madje edhe për miellin për ata që duan të gatuajnë kifle. “Muzika festive kumbon nga të gjithë altoparlantët në qytet, argëtimet ditore janë në kulm, ndërsa në televizione rrotullohen reklama për kredi të shpejta. Por të gjithë jemi më të kujdesshëm dhe shpenzojmë gjithnjë e më pak para, madje marrim edhe kredi për të festuar. Kush sa ka, aq do të shpenzojë, por çdo vit gjithnjë e më pak”, thonë shumica e qytetarëve.
Pak kush do të udhëtojë, ndërsa pothuajse i njëjtë është numri i atyre që do të festojnë në restorante, të cilat kanë caktuar që mbrëmjen e 31 dhjetorit të tarifojnë edhe 4000-5000 denarë për person.
