Kur flitet për dhunën në familje zakonisht janë gratë ata që e raportojnë atë, ndërsa numri i burrave të cilët kërkojnë ndihmë për këtë çështje është shumë i ulët, dhe këtë e konfirmojnë edhe nga linja telefonike SOS. Sipas tyre një numër i caktuar i burrave që kanë qenë dëshmitar ose vetë e kanë përjetuar dhunën kanë thirrur në numrin e tyre.
“Të gjithë meshkujt që thërrasin ose janë dëshmitar të dhunës ndaj një motre, një gruaje të afërt, ose përjetojnë dhunë nga familjarët, siç janë babai, vëllai, etj. Përqindja e meshkujve të cilët raportojnë dhunë nga një grua është nën 0.1%. Numri i përgjithshëm i thirrjeve në linjën SOS deri në muajin nëntor arrin në mbi 500 thirrje”, thonë nga atje.
Rastet e dhunës raportohet si nga banorët e Shkupit ashtu edhe nga vendet tjera brenda territorit të Maqedonisë së Veriut. Aty, siç njoftojnë nga atje, ju ofrohet ndihmë dhe mbështetje për të tejkaluar situatën në të cilën ndodhen.
“Nga linja SOS i referojmë në institucionet përkatëse, në varësi të nevojave të viktimës, ndërsa në qendrën e këshillimit i ofrojmë ndihmë psiko-sociale dhe ligjore falas. Sa i përket numrit të raportimeve, vitet e fundit kemi një rritje të numrit të viktimave, dhe meqenëse linja i shërben gjithë territorit të Maqedonisë së Veriut, viktimat telefonojnë nga i gjithë vendi”, thotë Savka Todorovska, koordinatore e linjës SOS.
Praktika në vend ka treguar se gratë fillimisht e raportojnë dhunën dhe më pas heqin dorë nga ndjekja penale. Në gjashtëmujorin e parë të këtij viti policia ka raportuar për 540 denoncime për dhunë në familje, prej të cilave numri më i madh i viktimave apo 410 prej tyre janë të gjinisë femërore, gjithashtu kanë ndodhur dhe dy femicide, një në Kumanovë dhe një në Koçan. Në muajin gusht, viktima ishte një grua 40 vjeçare nga Kumanova, ndërsa burri i saj vrau edhe nënën e saj, dhe më pas u vetëvra duke u plagosur dhe hedhur nga një ndërtesë. Një muaj më vonë, në shtator, një burrë vrau një grua 46 vjeçare duke i shkaktuar 40 plagë me thikë. /koha/
