Presidenti turk, Recep Tayyip Erdogan, ka lëshuar deklarata të forta kundër Izraelit, duke e akuzuar këtë të fundit për agresion të vazhdueshëm në rajon dhe për dështim në kuptimin e pasojave afatgjata të veprimeve të tij.
Në një fjalim të kohëve të fundit, ai theksoi se mbështetja e pakufizuar që Izraeli merr nga Perëndimi po e shtyn atë të veprojë pa ndjeshmëri ndaj realitetit gjeopolitik dhe historik të rajonit.
“Izraeli, i cili sulmon Iranin me mbështetjen e pakufizuar të Perëndimit, shkatërron Gazën dhe ushtron presion mbi çdo vend në rajon, nuk është i vetëdijshëm për pasojat e veprimeve të tij”, deklaroi Erdogan.
Ai paralajmëroi se Izraeli mund ta kuptojë gabimin e tij vetëm kur të jetë tepër vonë, duke nënvizuar se asnjë vend në këtë gjeografi të lashtë nuk është i izoluar nga të tjerët, për shkak të lidhjeve të thella historike dhe kulturore.
Presidenti turk shtoi se çdo sulm ndaj Palestinës ose Iranit nuk është një çështje që prek vetëm popullsinë lokale, por ka një ndikim të gjerë në të gjithë rajonin dhe shkakton pasoja afatmesme dhe afatgjata për të gjitha shoqëritë.
“Sulmet ndaj popullit palestinez dhe territoreve të tyre nuk janë vetëm një çështje e disa milion njerëzve atje. Po kështu, sulmi ndaj tokave iraniane nuk është vetëm një çështje që prek shtetin iranian.”
Duke vazhduar fjalimin e tij, Erdogan paralajmëroi se çdo hap i ndërmarrë në rajon pa vlerësuar realitetet historike dhe shoqërore sjell fatkeqësi të reja.
Ai kujtoi se “këto fatkeqësi zakonisht përfundojnë me zhdukjen e shtypësve”.
“Izraeli po rrezikon ekzistencën e tij dhe të ardhmen e shoqërisë së tij me çdo akt shtypjeje që kryen, me çdo gjak që derdh dhe me çdo krim kundër njerëzimit që kryen”, theksoi lideri turk, duke dhënë një paralajmërim të qartë për pasojat që mund të ketë agresioni i vazhdueshëm izraelit.
