Kreu i komunës së Tetovës, Bilall Kasami sot njoftoi se Këshilli i komunës ka propozuar formimin e një komisioni për ndryshimin e emrave të rrugëve. Kasami tha se paraprakisht do të ketë debat publik, dhe se për këtë çështje do të merren parasysh edhe propozimet e shoqatës shqiptare të akademikëve për shkencë dhe kultur si dhe propozimet e qytetarëve.
“Unë besoj që ata të cilat do t’i gjejnë të arsyeshme, komisioni i Këshillit do t’i pranojë dhe do të vazhdojë tutje me procedurën. Besoj që procedura do të jetë deri në fund transparente, sepse kjo është interes i qytetit, i çdo qytetari”, u shpreh Kasami.
“E kemi mirëkuptimin e të gjithë faktorëve politikë dhe shoqërorë për këtë çështje. Shumë rrugë dhe lagje në Komunën e Tetovës kanë qenë me emërtime joadekuate. Prandaj kam ngritur një grup pune që ka punuar në identifikimin e rrugëve dhe si rezultat i asaj janë identifikuar gati 300 rrugë që janë emërtuar jo sipas ligjit. Do të kemi proces gjithëpërfshirës për emërtimin e rrugëve të qytetit”.
