Kosovë, masat kundër Covid-19 nuk pritet të ndryshojnë

    Prej kohësh, situata epidemiologjike me Covid në vend është e qetë ndërsa edhe numri i pacientëve që kërkojnë shërbime shëndetësore me këtë sëmundje ka rënë ndjeshëm. Vende evropiane kanë lehtësuar ndjeshëm masat, e fundit Greqia, që paralajmëroi se prej 1 majit do t’i kthehet pothuajse normalitetit.

    Por, në një tjetër vend situata është ndryshe. Banorët e Shangait po hyjnë në javën e tretë të mbylljes si pjesë e masave të rrepta kufizuese pas përhapjes së variantit Omicron.

    Gjithsesi, në Kosovë ende janë në fuqi masat që janë marrë më 1 mars dhe ato nuk pritet të lehtësohen më tej.

    Ministri i Shëndetësisë, Rifat Latifi, ka thënë për KP se momentalisht nuk do të ketë ndonjë ndryshim të masave, por që situata është duke u ndjekur me vëmendje.

    “Tash për tash (masat) kanë me mbet kështu siç janë. Siç po shihet vendet e ndryshme janë në telashe me COVID-in, shembull sa mësova para dy ditëve se Filadelfia i ka vendosur maskat brenda në çdo vend, i ka bërë mandatore. Neve na duhet me pa se si po rrjedhë çështja me zhvillimin e COVID-it”, tha shkurt Latifi.

    Sipas të dhënave të fundit, nga 888 testime, 22 qytetarë kanë rezultuar pozitivë me virusin COVID-19. Në total numri i rasteve aktive është 499.

    Lajmi Paraprak

    LSDM: Mësimdhënësit duhet të udhëhiqen nga interesat e nxënësve

    Lajmi i rradhës

    Alibeaj prezanton platformën për bashkimin e demokratëve: Veprimet tona do i gjykojë koha

    Lajme tjera

    Bashkohu

    Informohu në kohë