“VENDI SHANTAZHOHET NGA DY PARTI POLITIKE”
Nuk ka një përgjigje nga kryeministri Dimitar Kovaçevski nëse Qeveria ka 80 deputetë për ndryshimet kushtetuese. Sipas tij, ndryshimet kushtetuese janë proces në vazhdë e sipër dhe të gjithë deputetët duhet t`i mbështesin. Kryeministri, sic njofton KlanM, thotë se Maqedonia e Veriut shantazhohet nga dy parti politike.
“Ndryshimet kushtetuese nuk janë të një dite. Është obligim i deputetëve ta mbështesin rrugën drejt BE-së dhe të mos e pengojnë. Nuk është ky një proces i një njeriu, një partie, një Qeverie. Është proces i gjerë shoqëror dhe politik që kërkon konsensus. Ne kemi shantazh politik në vend, ku VMRO-DPMNE dhe “Levica” thonë se nuk mbëstesin ndryshimet kushtetuese, kurse kur do t`i pyesni për planin – nuk kanë një plan” – tha Kovaçevski.
VMRO-DPMNE-ja, siç njofton KlanM, mbetet në qëndrimin për zgjedhje të parakohshme parlamentare, duke potencuar se askush nuk ka fituar mandatin për të ndryshuar Kushtetutën.
Ndërkohë ASh-ja vazhdon konsultimet brendapartiake nëse do të bëhet pjesë e shumicës qeveritare, kurse vendimi përfundimtar pritet të premten.
Sipas paralajmërimeve, procedura për ndryshimet kushtetuese do të fillonte më së voni në Qershor – Korrik të këtij viti, kurse thirrje për miratimin e tyre dhe zhbllokimin e negociatave për anëtarësim në BE ishin dërguar edhe nga bashkësia ndërkombëtare.
