“Është koha e duhur që të ndalojmë ndërhyrjen në gjyqësor,” tha kryetari i kuvendit, Afrim Gashi, kur iu kërkua të komentonte kthimin e ish-zëvendëskryeministrit Artan Grubi në vend, i cili kishte qenë në arrati për më shumë se një vit dhe u rikthye të hënën. Gashi shtoi se nuk është e përshtatshme për kuvendin dhe për të personalisht, si kryetar i Odës Legjislative, të komentojë vendimet politike, përcjell Nistori.
“Megjithatë, ajo që kam deklaruar publikisht dhe mund ta përsëris është se është koha e duhur që të ndalojmë ndërhyrjen në gjyqësor. Ky perceptim te qytetarët se ekziston një lloj marrëveshjeje krijon një ndjesi të keqe te të gjithë. Mesazhi im do të ishte që çdo institucion duhet të bëjë punën e vet. Në këtë rast, gjyqësori dhe prokuroria duhet ta bëjnë punën e tyre me ndërgjegje dhe profesionalizëm. Kjo do të mjaftojë që qytetarët të jenë të kënaqur. Në fund të fundit, drejtësia është e rëndësishme,” tha Gashi në një deklaratë për mediat.
Kryetari i Parlamentit u bëri thirrje të gjitha institucioneve dhe aktorëve në shoqëri: gjyqësorit, prokurorisë, ekzekutivit dhe legjislativit, që të kryejnë punën e tyre profesionalisht dhe me ndërgjegje.
“Nëse të gjithë punojmë në një drejtim, mendoj se do të arrijmë efekte pozitive më shpejt,” tha Gashi, duke shtuar se nuk ka më kohë për të humbur në ndërtimin e një shteti ligjor.
Kryetari i Parlamentit nuk beson se kthimi i Artan Grubit është një vendim politik.
“Nuk kam informacion dhe nuk mund të pohoj diçka që nuk e di,” tha ai. /Nistori/
