Qytetarët do të hanë fruta shumë të shtrenjta këtë verë. Një pjesë e frutave që kultivohen në vendin tonë shiten në treg me çmime jashtëzakonisht të larta. Kajsi për 300 denarë, qershi për 400 denarë, pjeshkë deri në 200 denarë. Ministria e Bujqësisë thotë se kjo situatë do të duhet të diskutohet, sepse çmimi i prodhimit përcaktohet nga prodhuesi.
“Këto çmime nuk mund të ndryshojnë shumë nga një prodhues te tjetri. Kjo është arsyeja pse do të na duhet të krijojmë praktikë dhe strategji pozitive në mënyrën e rregullimit të këtyre çmimeve, ashtu siç vitin e kaluar u krijua metodologji për përcaktimin e çmimit të rrushit për prodhim të verë, i cili u rrit me përqindje të caktuar, dhe kështu u formua çmim i përgjithshëm nacional, midis të gjithë blerësve të rrushit. Dhe ndoshta ky shembull duhet të ndiqet nga të tjerët dhe në këtë mënyrë do të jemi në gjendje të përcaktojmë çmim që do të jetë i pranueshëm si për prodhuesit ashtu edhe për konsumatorët”, tha Borçe Serafimovski – sekretar shtetëror në Ministrinë e Bujqësisë.
Problem shtesë është se vendi mbetet seriozisht i varur nga importet e produkteve bujqësore. Të dhënat janë se deri në 70% e domateve, specave dhe trangujve vijnë nga Shqipëria, Greqia dhe Turqia. Ekspertët thonë se Maqedonia e Veriut ka probleme serioze strukturore që duhen zgjidhur në mënyrë që të përmirësohet prodhimi bujqësor.
“Së pari, ne jemi shumë të fragmentuar, që do të thotë se ferma jonë mesatare është 2 hektarë, që është shumë e vogël për të mbijetuar. Nuk është ekonomi fitimprurëse, përveç nëse punoni me disa kultura të shtrenjta. Problemi i dytë është mosha. Në vitin 2016, mosha e fermerit mesatar ishte 56 vjeç, kanë kaluar 10 vjet që atëherë, dhe shumë pak po hyjnë në këtë degë. Dhe tani fermeri ynë mesatar është më i vjetër se 60 vjeç”, tha Jordan Çukaliev – profesor në Fakultetin e shkencave bujqësore dhe ushqimore.
Shumica e 180,000 ekonomive bujqësore të regjistruara në Maqedoninë e Veriut nuk janë bujqësore, thotë Çukaliev, sipas të cilit në fakt ka rreth 70,000 fermerë në vend./Alsat/
