Komiteti Ekzekutiv i VMRO-DPMNE-së sonte ka miratuar pyetjen e referendumit. Pyetja për referendumin, të cilin partia opozitare maqedonase do ta propozojë të jetë i obligueshëm, do të jetë:
“A jeni për heqjen e vlefshmërisë së Ligjit për ratifikimin e Marrëveshjes për miqësi, fqinjësi të mirë dhe bashkëpunim ndërmjet Maqedonisë dhe Bullgarisë, i publikuar në Gazetën Zyrtare të datës 18 janar 2017?
Në konferencë për media, kryetari i VMRO-DPMNE-së Hristijan Mickoski tha se partia e tij e përkrah integrimin në BE, por nuk e përkrah asimilimin dhe deformimin e identitetit.
“Komiteti Ekzekutiv mori vendim për iniciativën qytetare për mbledhjen e nënshkrimeve për referendum. Javën që vjen do të mbledhim të paktën 100 nënshkrime të kualifikuara për të dorëzuar iniciativën në Kuvend. Pas miratimit do të fillojnë afatet për mbledhjen e nënshkrimeve për referendum të detyrueshëm”.
“Pyetja e referendumit do t’i referohet Marrëveshjes me Bullgarinë e nënshkruar nga Zaev. Kjo është rrënja e problemit. VMRO-DPMNE do të bëjë thirrje për votim “po” për këtë çështje. Autoritetet duhet të lejojnë popullin të shprehet”, tha Mickoski.