Masa për kufizimin e marzheve të produkteve ushqimore bazë në tregtinë me shumicë dhe pakicë do të jetë në fuqi edhe për dy javë të tjera. Kryeministri Dimitar Kovaçevski tha sot se janë duke u bërë analiza se si të rimodelohet kjo masë e cila është miratuar për të parandaluar goditjen e çmimeve në Maqedoni. Kovaçevski siguron se nuk dëshiron që masat e qeverisë të ndikojnë negativisht në punën e kompanive private që prodhojnë ushqime.
“Në Ministrinë e Ekonomisë bëhen çdo ditë analiza se sa do të jenë të qëndrueshme këto masa dhe si do të modifikohen, duke qenë se objektet e prodhimit nuk duhet t’i vendosim në një situatë që duhet të punojnë me humbje, sepse në atë rast do të bëhet jolikuide”, tha Dimitar Kovaçevski-Kryeministër
Pikëpamja e biznesmenëve është se marzhi i kufizuar është një masë më e mirë se çmimet e ngrira të produkteve ushqimore bazë. Por, megjithatë shtojnë se kufizimi i profitit nuk rezulton të jetë një garanci që çmimet përfundimtare nuk do të vazhdojnë të rriten. Pas një sërë rritjesh të çmimeve për lëndët e para, energjisë elektrike, transportit, madje edhe fuqisë punëtore me rritjen e pagës minimale, kompanitë tashmë kanë llogaritur në çmime të reja më të larta për shumicën e produkteve të tyre.
“Kjo është një zgjidhje e pjesshme, sepse sërish prodhuesit ku në hyrje janë rritur ndjeshëm inputet, e kam fjalën për çmimin e energjisë elektrike ku është rritur 400 për qind, karburantet, lëndët e para janë rritur nga 60 në 80 për qind, . paga minimale, e diela ditë jopune, e gjithë kjo reflektohet në anën e hyrjes gjatë prodhimit të produkteve”, tha Goran Georgievski Kryetar i Odës së Agro-Biznesit në LOE
Për qytetarët, marzhet e kufizuara nuk dhanë efektin e dëshiruar. Për fuqinë blerëse ankohen çdo ditë se është ulur ndjeshëm, pagat e shumicës së punëtorëve kanë ngecur dhe çmimet janë ngritur në qiell. Maqedonia ka hyrë në inflacion dyshifror, që nuk e ka pasur që nga pavarësimi nga Jugosllavia. Ekspertët paralajmërojnë se çmimet do të rriten deri në fund të vitit, por pavarësisht stabilizimit të paralajmëruar, por janë skeptikë se ulja e kostove të qytetarëve do të ndodhë së shpejti. /Alsat/
