Më 30 dhjetor të vitit të kaluar, Komuna e Kumanovës njoftoi për subvencionimin e transportit në linjat e transportit publik për qytetarët, se do të mund të përdorin transportin komunal pa pagesë nga 01.01.2023 deri më 30.06.2023. Transporti falas urban ka filluar në fillim të këtij viti, për herë të parë në një komunë në vend me gjithsej 15 linja.
Transporti publik falas në Kumanovë do të kushtojë mbi 1 milion euro nëse vazhdon deri në fund të vitit, paralajmëron Dimitrievski. Ai gjatë një paraqitje televizive theksoi se me zbatimin e masës për transport publik falas në Kumanovë, është zvogëluar bllokimi i trafikut në qytet dhe është arritur një efekt shtesë mjedisor.“Ne kemi reduktuar numrin e transportuesve ilegalë në Kumanovë dhe një nga masat kryesore është krijimi i zakonit të përdorimit të transportit publik, kështu që në të ardhmen pse të mos investohet në diçka më moderne dhe më bashkëkohore”, tha Dimitrievski.
Dimitrievski gjithashtu falënderoi transportuesit publik që me shumë përkushtim dhe virtyt hynë në një projekt të tillë, dhe përkundër faktit që ata morën fonde treguan një nivel të lartë të përgjegjësisë sociale, këto janë mbi të gjitha kompanitë që u ngritën në atë bashkëpunim dhe u ndërtuan si kompani. Ai theksoi se nga buxheti janë ndarë mjete për transport publik falas deri në fund të shtatorit, por planifikojnë të zgjasin masën nëse këshilli miraton fondet. “Jam krenar që vendimi është marrë me konsensus absolut, me shumë pak politikë në vendim dhe qytetarët e përdorin. Analizat tona që i kemi bërë tregojnë se diku deri në 18 mijë bileta përdoren në ditë në 26 linja të ndryshme, ose 18 mijë transporte”, shtoi Dimitrievski.
Qytetarët që përdorin transportin e mbështesin masën, duke theksuar se transporti publik ua lehtëson jetën, sidomos gjatë ditëve me bore dhe shi, ndërsa të tjerët konsiderojnë se është një humbje e panevojshme parash në kohë krize, pasi bashkia ka një sërë problemesh infrastrukturore për të zgjidhur. (koha.mk)
