Dëmet që u janë shkaktuar bujqve nga kafshët e egra muajt e fundit në komunën e Dibrës, por edhe më gjerë, janë shumë të mëdha. Derrat e egër, arinjtë dhe ujqit kanë rrënuar mbjelljet në fushat pjellore, sidomos në arat e fshatrave kufitare, por jo vetëm. Bujqit thonë se nuk ka pasur dëme të këtij niveli deri më tani. Pjesa më e madhe e të mbjellave pranverore është shkatërruar.
Pikërisht për këtë shkak, një takim urgjent kanë zhvilluar udhëheqësia e Shoqatës së Gjuetarëve dibranë “Stogova 2” dhe kryetari i Komunës së Dibrës, Fisnik Mela. Në takim janë përcaktuar masa konkrete për aktivitetet e shoqatës, me qëllim parandalimin e dëmeve që po shkaktojnë kafshët e egra në fushën e Dibrës, të cilat këtë sezon janë në numër të shtuar.
Në kumtesën e Komunës së Dibrës theksohet se është debatuar për praninë e shtuar të kafshëve të egra dhe për masat që duhet të merren për të ndalur dëmtimin e mëtejshëm të të mbjellave në arat pjellore. “Në takim u shqyrtuan problemet që kanë bujqit me kultivimin e kulturave bujqësore dhe dëmet e mëdha që u shkaktohen nga kafshët e egra. Po ashtu u fol edhe për praninë e tyre në qytet dhe në fshatrat përreth, në kërkim të ushqimit, një fenomen që rrezikon sigurinë e qytetarëve”, thuhet në kumtesë.
Nga ana e gjuetarëve u theksua se ata veprojnë në përputhje me ligjin dhe se aktiviteti i tyre aktual është brenda normave ligjore për gjuetinë. Ata potencuan nevojën që kafshët e egra në rajon të ushqehen, duke propozuar ngritjen e një shtëpie malore, objekt që do të plotësonte nevojat e të gjitha shoqatave në Dibër. Masat kundër kafshëve të egra, sipas tyre, do të merren në përputhje me Ligjin për Gjuetinë.
Kryetari i Komunës, Fisnik Mela, dhe udhëheqësia e Shoqatës së Gjuetarëve “Stogova 2” informuan se në debat u konkludua që së shpejti do të ndërmerren masa për t’u dalë në ndihmë bujqve dhe për tejkalimin e situatës, e cila vlerësohet alarmante. Në këto aktivitete do të përfshihet edhe Shoqata e Bujqve në Dibër.
Përfaqësues të Shoqatës së Bujqve dibranë për gazetën Koha deklaruan se dëmet e shkaktuara nga kafshët e egra, sidomos nga derri i egër dhe ariu, janë tepër shqetësuese. Sipas tyre, nëse nuk ndërmerren masa së bashku me gjuetarët, nga mbjelljet pranverore nuk do të mbetet asgjë. Ata shtojnë se dëmet në arat e fshatrave kufitare, si Spasi, Sollokiqi, Bomova dhe Shullani, janë shumë të mëdha. Shoqata thekson se bujqit duhet të kërkojnë kompensim edhe nga pushteti qendror, pasi dëmet janë të konsiderueshme.
