Ministri pa resor i angazhuar për diasporën, Xhemail Çupi, duke folur për diasporën dhe regjistrimin e tyre, tha se në bazë të statistikave zyrtare, 12.4 për qind e totalit të nënshtetasve të RMV-së, janë në diasporë.
“Por, në anën tjetër e dimë dhe jemi të sigurt se jo e tërë diaspora është e regjistruar. Madje, me përgjegjësinë më të madhe mund të them se kjo është gjysma e diasporës. Kemi dy periudha, është periudha e parë ku kishte një të themi entuziazëm, ku ishin të involvuar të gjitha palët për regjistrimin e diasporës, në anën tjetër mund të themi se periudha e demoralizimit ishte pas atij vendimi të famshëm që të shtyhet procesi i regjistrimit brenda territorit të Maqedonisë”, tha ministri Xhemail Çupi në emisionin debativ në TV Shenja.
Ai tha se me këtë vendim më nuk diskutohej për regjistrimin e diasporës.
“E dyta ne kemi një diasporë të jashtëzakonshme në SHBA, e kemi një diasporë të madhe në Australi, Kanada… Regjistrimi në këto vende nuk ishte me intensitet të lartë siç ishte në Evropë. Në Evropë normal jemi shumë më afër, lidhja është më e drejtpërdrejt, ndërsa në SHBA përballemi me disa situata them këtë sepse isha në vizitë. Atje ka shumë njerëz prej qytetarëve tanë që janë pa dokumentacione”, u shpreh Xhemail Çupi, duke shtuar se një pjesë e diasporës maqedonase e kanë bojkotuar regjistrimin.
