Nënat e punësuara në vend mund të përfitojnë mbështetje të konsiderueshme financiare përmes rimbursimit të plotë të tatimit mbi të ardhurat personale të paguar nga paga e tyre. Kjo është risia kryesore e parashikuar me ndryshimet dhe plotësimet e propozuara të Ligjit për Tatimin mbi të Ardhurat Personale, të cilat tashmë janë dorëzuar në procedurë parlamentare, përcjell Nistori.
Sipas zgjidhjes së propozuar ligjore, në vend të përfitimeve të reja sociale ose pagesave të drejtpërdrejta nga Buxheti i shtetit, mbështetja do të realizohet përmes rimbursimit të 100 për qind të tatimit mbi të ardhurat personale të paguar nga paga. Në të njëjtën kohë, mekanizmi ekzistues i llogaritjes dhe pagesës së tatimit mbetet i pandryshuar, ndërsa shuma e paguar do t’u rimbursohet nënave të punësuara.
“Konkretisht, amendamenti i propozuar parashikon të drejtën e nënës së punësuar për rimbursim të 100 për qind të tatimit mbi të ardhurat personale të paguar nga paga e saj: për nënën e fëmijës së parë, për një periudhë prej 12 muajsh; për nënën e fëmijës së dytë, për një periudhë prej 24 muajsh; ndërsa për nënën e fëmijës së tretë, derisa fëmija të mbushë 18 vjeç. Ky projektligj pritet të kontribuojë në përmirësimin e gjendjes materiale të familjeve me fëmijë, rritjen e sigurisë financiare të nënave të punësuara dhe krijimin e kushteve më të favorshme për harmonizimin e punës me jetën familjare, si dhe në arritjen e qëllimeve afatgjata të shtetit në fushën e politikës demografike dhe nxitjen e natalitetit”, thuhet në projektligjin e dorëzuar në Kuvend.
Ndryshimet ligjore janë propozuar nga deputeti Mile Cekov, i cili më parë ishte pjesë e ZNAM-it, por së fundmi është larguar nga partia dhe tani vepron si deputet i pavarur.
Sipas projektligjit, kohëzgjatja e kësaj mase do të varet drejtpërdrejt nga numri i fëmijëve.
Për nënat e fëmijës së parë parashikohet rimbursimi i tatimit për një periudhë prej një viti, përkatësisht 12 muajsh. Nënat që lindin fëmijën e dytë do ta gëzojnë këtë të drejtë për dy vjet, ndërsa për nënat që lindin fëmijën e tretë rimbursimi parashikohet deri në mbushjen e moshës 18-vjeçare të fëmijës.
Ndryshimet e propozuara synojnë të lehtësojnë barrën financiare të familjeve dhe harmonizimin e detyrimeve profesionale me jetën familjare. Sipas arsyetimit të projektligjit, stabiliteti financiar konsiderohet një nga faktorët që ndikojnë në vendimet për zgjerimin e familjes, ndërsa masa synon përmirësimin e gjendjes materiale të nënave të punësuara.
Gjithashtu, propozuesi vlerëson se kjo masë mund të kontribuojë në arritjen e qëllimeve afatgjata të politikës demografike dhe në nxitjen e natalitetit në vend. /Nistori/
