Furnizimi me insulinë dhe terapisë për sëmundje të rralla për këtë vit, blerja e pajisjeve mjekësore për nevojat e Klinikës së Kirurgjisë, Klinikës Gastro, Spitalit 8 shtatori dhe Spitalit Klinik të Tetovës, janë tenderët që do të presin deputetët të përfundojë diskutimin e gjatë për rikonstruimin e qeverisë. Arsyeja e pritjes është se në Ministrinë e Shëndetësisë nuk ka as ministër e as zëvendësministër që do të mund t’i miratojë dhe firmos këto blerje. Aty deri më 13 shkurt këto funksione i kanë kryer Bekim Sali dhe zëvendësi i tij, Vladimir Rendevski, i cili vetë dha dorëheqje. Sali është praktikisht ende në detyrë, por askush në Ministri nuk u përgjigjet gazetarëve nëse ai vjen në punë. Sipas të dhënave nga Byroja e Prokurimit Publik, këto shpallje janë publikuar në fillim të muajit dhe deri në fund të këtij muaji do të duhet të nënshkruhen për të filluar dhe zbatuar prokurimin.
E njëjta situatë është edhe në sektorin e drejtësisë. Pasi ministri i Drejtësisë, Nikolla Tupançevski dhe zëvendësministri i tij Agim Nuhiu dhanë dorëheqje më 13 shkurt, në këtë ministri nuk ka njeri që të nënshkruajë llogarinë përfundimtare, e cila është obligim i të gjitha institucioneve që ta përfundojnë deri në fund të muajit dhe as ti nënshkruajnë lëndët që vijnë për miratimin e një ministri dhe janë të lidhura me afate, si për shembull. ekstradimi i të akuzuarve ose të dënuarve.
Ish kryeparlamentari Tito Petkovski, në një paraqitje për mediat habitet se pse Qeveria shkarkon një ministër dhe një zëvendësministër në të njëjtën kohë, duke lënë kështu institucionet pa përfaqësues.
“Ky është një vlerësim shumë i keq i qeverisë aktuale dhe partive në pushtet që menduan se do ta kalojnë këtë lehtësisht pa asnjë pasojë, do të thotë se përgjegjësia është e tyre, ata duhet të bëjnë një vlerësim real se në çfarë gjendje do të jetë Ministria e Drejtësisë e cila nuk mund të përgjigjet në një nga supozimet themelore siç është huamarrja apo Ministria e Shëndetësisë ku mjekët mund të mos marrin rrogë ose të mos sigurohen ilaçe”, thotë Petkovski.
Debatit në Parlament nuk i shihet fundi pasi rreth 20 deputetë presin ende radhën për të folur dhe pika e parë e rendit të ditës është ende shkarkimi i ministrave. Sipas vlerësimeve të disa deputetëve, diskutimi për rikonstruimin e qeverisë mund të zgjasë edhe tre javë. Për shumicën qeverisëse, problemi qëndron tek opozita, pra përpjekja e saj për të bllokuar zgjedhjen e ministrave të rinj. Nënkryetari i Parlamentit, Goran Misovski, thotë se është e vështirë të parashikohet se sa do të zgjasë debati dhe se pret që deputetët të votojnë shkarkimet deri në fund të javës, pas së cilës do të fillojë debati për zgjedhjet të ministrave të ri.
“Zgjidhja është që opozita të tërhiqet nga diskutimi i kotë. Nuk ka debat përmbajtësor në Parlament, po humbim kohë dhe para”, thotë ai.
Nga ana tjetër, opozita mendon se faji i është hedhur padrejtësisht Parlamentit. Deputeti i VMRO-DPMNE-së Mile Lefkov thotë se debati do të vazhdojë, por të premten në mbrëmje i kanë kujtuar qeverisë se derisa të votohet shkarkimi i Salit, qeveria ka ministër të shëndetësisë. Pas diskutimit për shkarkimin e tij të premten, Lefkov thotë se kryeparlamentari nuk e ka vendos për votim dhe e ka shtyrë për rastin e radhës.
“Kjo vetëm mund t’i tregojë opinionit maqedonas se negociatat, përkatësisht rikonstruimi i ‘Pazar3’, ende po vazhdojnë dhe në mënyrë të paarsyeshme përpiqen të fajësojnë Parlamentin”, thotë Lefkov.
Petkovski nuk e sheh problemin në rregullore, ku debati nuk kufizohet me afat, por në mungesë të kulturës politike dhe mungesës së ndjenjës së përkatësisë ndaj shtetit dhe jo partisë.
“Është pjesë e kulturës sonë politike, nëse një parti politike thotë hapur se po largohet nga shumica parlamentare, po largohet nga Qeveria, procedura kërkon që të gjithë të japin dorëheqje dhe pa debat në Parlament të konstatohet dorëheqja. Por kur nuk duan të japin dorëheqjen me kërkesë të partisë apo me kërkesë të ministrit, atëherë futemi në këto labirinte burokratike, që nuk mund të parashikojnë të gjithë elementët në procesin e vendimmarrjes në Parlament dhe vijmë në një absurd që disa sfera të jetës nuk mund të funksionojnë për shkak të mosefikasitetit të Parlamentit”, thotë Petkovski.
Ndërkohë, një nga pyetjet kyçe mbetet se sa deputetë numëron shumica parlamentare. Kryeministri Dimitar Kovaçevski në fjalimet e tij publike pretendon se qeveria ka një shumicë të qëndrueshme, por nuk precizon se sa deputetë ka gjithsej kjo shumicë. /koha/
