Minatorët e kombinatit metalurgjik Trepça, punojnë në kushte të rrezikshme për punë. Krahas shumë problemeve dhe mungesës së sigurisë, makineritë e vjetra mbi 50 vjet janë shqetësim i madh.
Disa prej minatorëve me të cilët foli Radio Evropa e Lirë, thanë se në shumicën e rasteve ata duhet t’i sigurojnë vetë disa pajisje mbrojtëse për punë. Minatorët aktualisht marrin pagë deri në 900 euro.
Kombinati Trepça, në të kaluarën ka qenë një ndër ndërmarrjet më të mëdha jo vetëm në Kosovë, por edhe në ish-Jugosllavi. Produktet kryesore, të cilat i prodhon Trepça janë: koncentrati i plumbit dhe zinkut me përmbajtje të argjendit, arit dhe elementeve tjera.
