Presidenti Stevo Pendarovski sot ka pritur në takim kryetarin e Komisionit Rregullativ për Energjetikë, Marko Bislimoski. Në takim është diskutuar për stabilitetin e sistemit elektroenergjetik të Maqedonisë dhe sfidat me të cilat përballet vendi, si dhe për dekretin e qeverisë për shpalljen e gjendjes së krizës në sektorin energjetik, përcjell Nistori.
“Në këtë drejtim, Bislimoski e informoi presidentin Pendarovski për aktivitetet që ndërmerren dhe masat e parapara në të ardhmen, kapacitetet e prodhimit vendor, si dhe të drejtat dhe obligimet e të licencuarve për kryerjen e aktiviteteve energjetike”, njoftojnë nga zyra e kreut të shtetit.
Presidenti Pendarovski theksoi se është e nevojshme të ndërmerren të gjitha masat për të adresuar me sukses sfidat e krijuara nga kriza globale energjetike, rehabilitimi e sektorit energjetik dhe nevojat e tregut, si dhe bashkëpunimin ndërmjet institucioneve shtetërore dhe kompanive në sektorin energjetik.
Sipas presidentit, vendimi për shpalljen e gjendjes së krizës është i domosdoshëm për zbatimin më efektiv të masave dhe adresimin e sfidave të krizës energjetike. /Nistori/
