A ia vlen të studiosh në Evropë? Sipas Pisa-s kjo duhet menduar dy herë. Vetëm shtetet aziatike dhe Estonia renditen në grupin më të mirë në krahasimin ndërkombëtar.
Nxënësit gjermanë kanë dalë më keq se kurrë më parë në studimin e Pisa-s, një krahasim ndërkombëtar i arritjeve arsimore. Sipas rezultateve të publikuara nga Organizata për Bashkëpunim dhe Zhvillim Ekonomik në Berlin, performanca e nxënësve 15-vjeçarë në tre fusha të marra nën lupë – matematikë, shkencë dhe aftësi e leximit – është përkeqësuar ndjeshëm.
Në testin e Pisa-s 2022 morën pjesë rreth 690.000 nxënës të moshës 15 vjeç nga 81 shtete; në Gjermani morën pjesë 6116 nxënës të zgjedhur rastësisht.
Arsyet për gjendjen e dobët
Si një nga arsyet për rezultatet e dobëta, OECD konsideron pasojat e mbylljes së shkollave gjatë pandemisë së koronavirusit. Megjithatë, në Gjermani, si në shumë vende të tjera, tashmë kishte një tendencë në rënie në performancën akademike përpara krizës së koronavirusit.
Kryetari e Konferencës së Përhershme të Ministrave të Arsimit, Senatori i Arsimit i Berlinit, Günter Wünsch, tha se rezultatet e studimit nuk ishin aspak të kënaqshme.
Ai përmendi mbylljen relativisht të gjatë të shkollave në Gjermani gjatë pandemisë së koronavirusit. Një shpjegim mund të jetë edhe heterogjeniteti i nxënësve. Një e treta e nxënësve nuk flasin gjermanisht si gjuhë amtare.
Sekretari i Shtetit i Arsimit në Brandenburg foli për një pamje të përgjithshme alarmuese. Veçanërisht dobët paraqiten segmentet socialisht të pafavorizuar të popullsisë.
Studimi i fundit i Pisa-s u publikua në vitin 2018. Në vitin 2001, studimi i parë i Pisa-s që përfshin Gjermaninë, çoi në përpjekje më të mëdha në politikën arsimore për shkak të rezultateve të dobëta. Pasuan rezultate më të mira. Megjithatë, tani rezultatet kanë rënë edhe më poshtë se në atë kohë.
Në krahasimin ndërkombëtar, në krye dolën studentët nga Singapori. Në përgjithësi, vendet aziatike kanë performuar më mirë. Nga Evropa, vetëm Estonia u rendit në grupin më të mirë.
Vetëm disa vende i kanë përmirësuar rezultatet e tyre
Pak vende të OECD-së ishin në gjendje të përmirësonin disa nga rezultatet e tyre midis viteve 2018 dhe 2022, si Japonia në lexim dhe shkencat e natyrës, dhe Italia, Irlanda dhe Letonia në shkencat e natyrës. Të rinjtë në Singapor, Japoni dhe Kore kanë aftësitë mesatare më të larta në matematikë. Singapori, Irlanda, Japonia, Koreja dhe Estonia kryesojnë në lexim. Në fushën e shkencave natyrore, rezultatet më të larta i kanë Japonia, Koreja, Estonia dhe Kanadaja.
Gjermania është vetëm në shkencat e natyrës dukshëm mbi mesataren e OECD-së (492 – 485 pikë). Rezultatet në matematikë (475 në 472) dhe lexim (480 deri në 476) tani janë në përputhje me mesataren e OECD-së, e cila gjithashtu ka rënë në të dyja fushat.
Pothuajse një e treta e 15-vjeçarëve kanë aftësi shumë të ulëta në të paktën një nga tre fushat. Rreth një në gjashtë të rinj ka mangësi të konsiderueshme në të tria fushat. Përqindja e të rinjve me rezultate veçanërisht të ulëta është rritur që nga viti 2018 në rreth 30 për qind në matematikë, rreth 26 për qind në lexim dhe rreth 23 për qind në shkencat e natyrës, ndërsa përqindja e nxënësve veçanërisht me performancë të lartë ka rënë përsëri – në matematikë në vetëm nëntë për qind dhe në lexim nën tetë për qind. Në shkencat natyrore, kjo përqindje mbetet e qëndrueshme në rreth dhjetë për qind.
Për të shpjeguar prirjen negative afatgjatë, studiuesit panë edhe pyetjet që u janë bërë nxënësve rreth motivimit, qëndrimeve ndaj të mësuarit dhe menaxhimit të mësimit. Krahasuar me vitin 2012, të rinjtë përjetojnë më pak kënaqësi dhe interes për matematikën. Përkundrazi, ankthi ndaj kësaj lënde është rritur. Veç kësaj, 15-vjeçarët shohin më pak përfitim nga të mësuarit e matematikës. /DW/
