Ministrja e Arsimit dhe Shkencës, Vesna Janevska, pret një ulje drastike të numrit të programeve studimore në universitete – nga më shumë se 1.300 sa janë aktualisht – me miratimin dhe zbatimin e Ligjit të ri për arsimin e lartë. Ajo beson se kriteret e përcaktuara qartë do t’i detyrojnë institucionet e arsimit të lartë që ose të mbyllen vetë, ose të mbyllen me forcën e ligjit, përcjell Nistori.
Sipas saj, situata aktuale është shpesh e papranueshme, pasi ka programe studimore ku regjistrohen vetëm një deri në pesë studentë.
“Kjo është absolutisht e papranueshme dhe për këtë arsye jemi dakorduar me universitetet që ta ndryshojmë këtë sistem studimesh, gjë që parashikohet edhe në ligj. Ne do të prezantojmë modularitetin. Për shembull, në Fakultetin e Drejtësisë, të gjithë studentët do të diplomohen si juristë. Dy vitet e para do të jenë të njëjta për të gjithë, ndërsa në dy vitet e fundit studenti do të specializohet. Kjo vlen për të gjitha fakultetet e tjera. Prandaj presim një ulje drastike të programeve studimore. Meqë të gjitha institucionet publike të arsimit të lartë në Maqedoni shumë shpejt do të duhet të përshtaten me këto kushte, presim që një numër relativisht i madh i tyre ose do të mbyllen vetë, ose do të mbyllen me forcën e ligjit”, tha Janevska në konferencën për shtyp, ku prezantoi paketën prej tre ligjesh për arsimin e lartë dhe kërkimin shkencor.
Ajo nuk pret që me heqjen e programeve studimore profesorët të mbeten pa punë. Sipas saj, do të kërkohet një zgjidhje edhe për shpërndarjen e pabarabartë të stafit akademik në fakultete dhe institute, pasi disa prej tyre përballen me mungesë stafi, ndërsa të tjerë me mbingarkesë.
“Prandaj, do të krijojmë një sistem përmes të cilit punësimi i stafit mësimor dhe shkencor do të sistematizohet, në mënyrë që të mos kemi as shumë pak, as shumë profesorë për programe të caktuara studimore. Sistematizimet do të kryhen nga vetë universitetet; shteti nuk do të ndërhyjë as në to, as në programet studimore dhe as në aktivitetet e tyre mësimore e shkencore. Por, për herë të parë, do të kërkojmë llogaridhënie. Do të kemi një Këshill Kombëtar funksional për Arsimin e Lartë dhe Shkencën, si dhe një sistem të brendshëm të sigurimit të cilësisë, i cili do të vlerësohet”, shtoi ministrja e Arsimit dhe Shkencës. /Nistori/
