Paralajmërimet e Qeverisë për “bum” në ndërtimtari për këtë vit – tani për tani po qëndrojnë në vend. Për dy muaj institucionet kanë realizuar vetëm 6% të projekteve kapitale. Ose në para – nga mbi 766 milionë euro të planifikuara për ndërtimin e rrugëve, shkollave, spitaleve, ujësjellësve, konvikteve studentore, objekteve sportive dhe pajisjeve shëndetësore, deri në fund të shkurtit janë shpenzuar vetëm rreth 47 milionë euro. Të dhënat e fundit financiare janë deri më 1 prill, kur realizimi është 69 milionë euro ose 9%. Ose mesatarisht në muaj “ndërtohet” nga 3% nga ajo që është planifikuar.
Përkundër realizimit të dobët, kryeministri paralajmëron kredi të re të dedikuar rreptësishtë vetëm për ndërtimin e rrugëve. Përveç një miliarda eurove nga Hungaria, do të marrim edhe 500 milionë euro të tjera hua nga një shtet europian.
Sektori i biznesit apelon që Qeveria të mbajë premtimet. Shpresë shohin te zgjedhjet.
Përndryshe të dhënat financiare deri në fund të shkurtit sipas institucioneve tregojnë se pothuajse të gjithë kanë dështuar me realizimin e projekteve të planifikuara këtë vit. Kështu që te pjesa më e madhe e ministrive realizimi është rreth 0%. Ata që kanë më së shumti projekte, ministria e transportit ka realizuar 1.64% apo prej 207 miliona eurove të planifikuara për ndërtim për këtë vit, janë realizuar vetëm 4.4 miliona euro. Te MPB realizimi është 1.96% apo janë shpenzuar 760 mijë euro nga mbi 37.4 miliona eurot e planifikuara.
Nga ana tjetër, realizim më të mirë ka te Ministria e mbrojtjes me pothuajse 20% apo prej rreth 140 milionave ka realizuar pothuajse 28 miliona euro. Ministria e arsimit me 9.47% ka realizuar 3.5 milionë euro nga 35.6 milionë euro të planifikuara.
Investimet kapitale janë aduti kryesor i Qeverisë për lëvizjen e ekonomisë dhe realizimin e rritjes së BPV për këtë vit prej 3.7%. /TV21/
