Qeveria lëvdohet me rritjen e pagave në gjyqësor. Për rritjen tashmë të dakorduar vitin e kaluar, Qeveria në seancën e mbrëmshme miratoi katër ligje në fushën e gjyqësorit.
Por këto paga të rritura punonjësit i marrin si shtesë muaj me radhë.
“Në kuadër të harmonizimit të Ligjit për shërbim gjyqësor me Ligjin për pagën minimale në Republikën e Maqedonisë së Veriut, pagat e punëtorëve në shërbimin gjyqësor rriten për 15 %”, thuhet në njoftimin e Qeverisë.
Por këtu nuk bëhet fjalë për mjete të reja. Situata është e njëjtë edhe me prokurorët publik. Këtë rritje e kishte bërë të ditur ish-ministri i drejtësisë, Bojan Mariçiq, një vit më parë. Realizimi filloi nga 1 janari i këtij viti.
“Nuk bëhet fjalë për harmonizim të pagave, nuk bëhet fjalë për rritje, sepse janë paguar tashmë pesë muaj, kështu që SPOGJ tashmë punon dhe atë që e kërkojmë për të gjithë të punësuarit në sektorin publik po e kërkojmë edhe për këta punonjës. Do të thotë që kërkesën tonë prej 2806 denarë duhet ta pranojnë edhe këta punëtorë, shërbimi gjyqësor, shërbimi i prokurorisë, gjykatësit dhe prokurorët”, u shpreh Tërpe Deanoski, kryetar i SPOGJ-it.
Ministria e drejtësisë konfirmon për Alsat se vendimi për rritjen e pagave për 15% është në fakt vetëm zëvendësim formal i shtesave aktuale të pagave.
“Me ndryshimet ligjore, pagat gradualisht do të harmonizohen me Ligjin për pagën minimale”, thonë nga Ministria e drejtësisë.
Sindikata e administratës si dhe Lidhja e sindikatave nuk ndryshojnë qëndrim. Grevë të përgjithshme do të ketë nëse nuk ka rritje të pagave prej 2806 denarë.
