Në ditën e mbajtjes së rrethit të dytë për zgjedhjen e presidentit të shtetit dhe zgjedhjet kuvendare, nesër nga ora 07:00 deri në orën 19, në zyrën e Avokatit të Popullit, qytetarët do të mund të denoncojnë çdo shkelje të së drejtës së votës në linjën telefonike falas 0800 54321.
Krahas linjës telefonike falas, qytetarët do të mund të raportojnë personalisht për shkeljen e të drejtës së votës në zyrën qendrore në Shkup, e cila gjendet në rrugën “Maqedonia” nr. 19, në objektin e TD “Makosped” (përballë Shtëpisë përkujtimore të Nënë Terezës).
Me qëllim të mbrojtjes së të drejtave të qytetarëve në votim, Avokati i Popullit do të ndërmerr masa të menjëhershme për veprim efektiv nga organet kompetente në procesin zgjedhor dhe institucionet tjera që janë të obliguara t’u ofrojnë mbrojtje qytetarëve që ushtrojnë të drejtën e tyre të garantuar të votës.
