SHGM: Rritet numri i incidenteve ndaj gazetarëve, kërkojmë reagim të shpejtë nga institucionet përgjegjëse

    Incidentet e fundit që ndodhën gjatë fushatës zgjedhore kundër gazetarëve duhet të hetohen, dhe më me rëndësi të mos përsëriten – kjo ishte tema e konferencës për shtyp që u mbajt sot në Shoqatën e Gazetarëve të Maqedonisë, njofton Nistori. 

    Kryetari i SHGM-së Mlladen Çadikovski kërkoi reagim të shpejtë nga Ministria e Punëve të Brendshme (MPB), Komisioni Shtetëror Zgjedhor (KSHZ) dhe Prokuroria Themelore Publike (PPO). 

    “Gjatë ditëve dhe javëve të kaluara, dëshmuam ofendime të shumta dhe të rënda, sulme, ngacmime verbale, duke rrezikuar integritetin dhe sigurinë e gazetarëve. E organizojmë këtë konferencë për shtyp disa ditë para ditës botërore kundër mosndëshkimit të sulmeve ndaj gazetarëve, sepse mendojmë se procesi zgjedhor solli shumë emocione që u kthyen në një qëndrim të papranueshëm të disa aktorëve politikë, pjesëmarrësve në zgjedhje, kandidatëve, eksponentëve partiakë dhe aktivistëve partiak”. 

    Në disa incidente të ndara, gazetarët janë diskredituar dhe fyer në tubime apo mbledhje partiake, dhe kjo u reflektua në mënyrë të drejtpërdrejtë në punën e kolegëve Xhumadije Ibraimi nga TV Klan, Salije Sadiku nga TV 21, Ferikan Arifi nga Euronews etj. SHGM regjistroi një fjalim nënvlerësues të kryetarit të KSHZ-së ndaj gazetareve gjatë një konference për shtyp, i cili më pas kërkoi falje; kolegët fotoreporterë dhe kameramanë u ankuan për qëndrimin e disa kryetarëve të komisioneve komunale të KSHZ-së që hapësirën publike e interpretojnë si pronë private; kolegë të tjerë gazetarë u ankuan për tone kërcënuese nga politikanët dhe eksponentët e fushatave partiake. Atmosfera e krijuar është paralajmëruese dhe duhet të ndalet menjëherë. Nuk bëhet fjalë për një parti apo një kandidat, por për aktorë të ndryshëm politik, thonë nga SHGM. 

    Para mediave të pranishme, u drejtua edhe gazetarja e Euronews Ferikan Arifi, e cila tha se pikërisht për arsye që ka qenë viktimë e sulmeve verbale, ka frikë se ato mund të kthehen në sulme fizike. Ajo u bëri thirrje institucioneve kompetente që të reagojnë në kohë, të hetojnë rastet në mënyrë që të mos përsëriten situata të tilla në të ardhmen. 

    Në këtë ngjarje foli edhe gazetarja Xhumadije Ibraimi nga TV Klan, e cila po ashtu theksoi seriozitetin e situatës në të cilën ishte gjetur vet. Konkretisht, gazetarja është shpifur dhe shantazhuar nga kandidati i Aleancës për Shqiptarët për kryetar komune në Tetovë, Vullnet Murseli. Ajo bëri thirrje për tolerancë dhe respekt për punën e saj, si dhe punën e të gjithë gazetarëve. 

    Janë paraqitur ankesa në MPB dhe KSHZ për të gjitha rastet e raportuara deri më tani në lidhje me sulmet ndaj gazetarëve gjatë procesit zgjedhor. SHGM bën thirrje që të reagohet shpejt, të respektohen gazetarët dhe puna e tyre nga aktorët politik, jo vetëm në procesin e fushatës zgjedhore, por edhe në të ardhmen. Në këtë ngjarje morën pjesë kryetari i SHGM-së, Mlladen Çadikovski, gazetarët Ferikan Iljazi Arifi, Xhumadije Ibraimi, Jovica Paunovski, Furkan Saliu dhe Robert Atanasovski, fotoreporter. /Nistori/

    Lajmi Paraprak

    Arsovska thotë se Shilegov bën fushatë të zezë ndaj saj | “Arsovska nuk ka qenë e sulmuar as nga unë dhe as nga fushata ime”

    Lajmi i rradhës

    “Nëse rrogat nuk rriten, punëtori në RMV nuk do të ketë ekzistencë”!

    Lajme tjera

    Bashkohu

    Informohu në kohë